Vanglaini - Russia-in Covid-19 vaccine kar hnih chhungin peih fel tum

KHAWTHLIR

Ramri vengtu zinga mi a thi

C Lalṭanpuia (46) s/o C Sualneka, Champhai Vengthlang chu August 12, Nilaini zan dar 7 khan rannung seh natna (scrub typhus) vangin a thi a, nimin khan vui a ni. A nupui H Lalnuntluangi leh an fate pali a kalsan. Thu dawn danin, C Lalṭanpuia hi Champhai Vengthlang YMA president a ni a; Covid-19 laka invênna atana ramri vennaah hun eng emaw chen a riak lut ve a, chuta ṭang chuan a thihpui tak rannung natna hi a kái a ni.

SRH-ah mi 59

State Referral Hospital-ah Covid-19 vei mi 59 enkawl mek a ni a, niminah dah luh thar an awm lo. Mi 59 zinga pakhat chu ICU-ah la awm zelin, ṭhat lam a pan a, Isolation Ward-a awm mi 55 zingah khawsik sang vak lo nei pahnih an awm a, ngaihtuahawm an ni lo. SICU-ah mi pathum an awm bawk.

1,717 khung hrang

August 12, 2020 thleng khan Mizoram hmun hrang hranga quarantine facility-ah khung hran mi 1,717 an la awm. Khung hrante chu Aizawl district-ah mi 853, Lungleiah 159, Siaha-ah 44, Champhaiah 42, Kolasib-ah 344, Serchhipah 91 Lawngtlaiah 89, Mamitah 54, Saitualah 17, Khawzawlah pakua leh Hnahthial district-ah mi pakhat an la awm a ni.

Antigen Test-in endik

Champhai Chief Medical Officer office chuan DC thupek bawhzuiin nimin khan frontline worker, sumdawng leh muṭia/porter-te'n Covid-19 an vei leh vei lo Rapid Antigen Test hmangin an endik a, hripui vei hmuh chhuah a ni lo. Champhaiah hian Rapid Antigen Test hi July 22, 2020-ah hman ṭan a ni a, mi 150 endik tawhin, Covid-19 vei mi pali hmuh chhuah tawh a ni.

Thisen pe

KṬP, Bethlehem Venglai Branch chuan nimin khan thisen pek rûnpui an huaihawt a, Aizawl Civil Hospital tan thisen unit 53 an pe a, a petute mipa 43 leh hmeichhia 10 an ni.

Sorkar chawlh

GAD chuan nimin khan notification tichhuakin, village council leh local council inthlan ní - August 27, 2020 chu inthlanna tur district-ah sorkar chawlh atan puan a ni tih a tarlang. Chawlh puan hi mipuite'n vote an thlak ṭheuh theihna atana tih a ni a; inthlanna tur - Aizawl, Lunglei, Champhai, Kolasib, Serchhip, Mamit, Saitual, Khawzawl leh Hnahthial district-te a huam a ni.

DAWNTISEI

Russia-in Covid-19 vaccine kar hnih chhungin peih fel tum

Russia chuan sorkarin a pawm tak, Covid-19 vaccine hmasa ber tur, 'Sputnik V' chu kar hnih chhungin peih fel hman a tum tih Russia health minister Mikhail Murashko chuan a sawi.

Thawhlehni khan Russia president Vladimir Putin chuan thla hnih dawn mihringa enchhinna neih a nih hnuah Russia sorkarin Covid-19 vaccine hmasa ber tur chu a pawm thu a sawi a, hei vang hian ram hrang hrangin an ngaihven zui thu leh India pawhin a ngaihven hle tih Russia lam chuan a tarlang.

Mithiam zinga ṭhenkhatte chuan Russia-in Covid-19 vaccine a siam hi a him tawk an rin loh thu an tarlang a, mi thiamte chuan dan pangngaiah chuan enchhinna hi kum khat vel hun a duh thu an sawi. Hei vang hian thla hnih pawh ral hman loa Russia-in vaccine peih fel a tum ta mai hi mak an ti hle.

Russia sorkarin a pawm tak Covid-19 vaccine hi trial tawp berna la neih pui a ni lo a, clinical trial-a enchhinna an neih 10% chauh chu a la hlawhtling niin mithiamte chuan an sawi a, hei vang hian eng emaw thil thleng thei vangin an hlauhthawn pui hle a ni.

Health minister Mikhail Murashko chuan vaccine Sputnik V hi Russia khaw-pui Moscow-a Gamaleya Institute siam a nih thu sawiin, kar hnih hnuaah chuan peih fel an tum thu a sawi a, doctor-te tan he vaccine hi hman phawt tum a nih thu Murashko chuan a sawi bawk.

Gamaleya Institute director Alexander Gintsburg chuan dose maktaduai 5 vel chu kum 2020 December leh 2021 January thla chhunga siam hman a tum thu a sawi ve bawk.

Share this Post

Login to comment

No Comments