Vanglaini - Islam sakhua sawichhiaa puh Pakistan courtroom chhungah kap hlum

KHAWTHLIR

Zira'n hmanpui

Minister R Lalzirliana chuan nimin khan MSU Sub-Headquarters, Saitual-in kumina HSLC leh HSSLC-a ti ṭhate chawimawina hun Saitual College-a an buatsaih a hmanpui. Bialtu MLA R Lalzirliana chuan, sorkar hna leh hna dangte a vàn tawh avangin, mi dang aia thawhrim leh hrât lâk a ṭul thu a sawi. Zirlai chawimawite chu - HSLC distinction leh first division-a pass mi 35 leh HSSLC distinction leh first division-a pass mi 34 an ni.

Negative vek

July 29, Nilaini khan Lunglei Civil Hospital laboratory-ah TrueNat-PCR hmangin swab sample 30 endik a ni a, Rapid Antigen Test hmangin Aizawlah sample pakhat leh Serchhipah panga endik a ni bawk. Heng zingah hian Covid-19 vei hmuh chhuah an awm lo.

Sample 200 endik

Nimin khan ZMC Covid-19 Laboratory-ah mi 200 velte swab sample endik a ni a, he thu ziah lai hian result a la chhuak lo. Sample endikte chu State Referral Hospital-a awm sate bakah, Aizawl, Mamit leh Serchhip aṭanga an dawnte a ni.

PPE siam zirtir

UNDP, EXIM Bank leh ZOHANDCO-te chuan July 7-30 chhungin ZOHANDCO building-ah puan tahtute tan personal protective equipment (PPE) kit siam zirna - Training for Product diversification for Weavers' of Aizawl District an buatsaih. Training-in a tum ber chu - puantah lama eizawng mi harsate thiamna thar neihtir a, Covid-19 leng karah eizawnna/sum lak luhna ṭha an neih theih nana buatsaih a ni.

Thisen pe

Nimin kha Ṭhalai Kristian Pawl din champha, ṬKP Day a ni a, he ni pual hian hmun ṭhenkhatah ṬKP-te'n thisen an pe. Lawngtlai Kanan unit leh Peniel Thingkah unit-te'n Lawngtlai District Hospital tan BCM Kanan Kohhran sunday school hall-ah thisen unit 24 an pe a, petute mipa 22 leh hmeichhia pahnih an ni. Siaha West Bial ṬKP pawhin Siaha District Hospital tan thisen unit 22 an pe a, petute mipa 19 leh hmeichhia pathum an ni.

SRH-ah 18 awm

State Referral Hospital (ZMC)-ah nimin khan Covid-19 vei mi pakhat dah luh thar a ni a, Covid-19 vei rinhlelh thilah mi pakhat dah luh a ni bawk. SRH-ah hian hripui vei mi 18 enkawl mek an ni a, ICU-ah mi pahnih, SICU-ah pakhat leh Isolation Ward-ah mi 15 an awm. SRH-ZMC Bulletin tarlan danin, ICU-a enkawl pakhat zawk chu ventilator hmantir a ni a, pakhat zawk erawh chuan hma a sawn zel. Isolation Ward-a awm zingah khawsik leh thawhah nasa vak lo nei pahnih an awm bawk.

Building inhlàn

West Phaileng-a Industrial Training Institute (ITI) building, Multi Sectoral Development Programme (MSDP) hnuaia sak chu Mamit DC Dr Lalrozama'n nimin khan LESDE department-ah a hlân. In hi Mission Foundation Movement, Bawngkawn, Aizawl hnenah June 23, 2018 khan Special Project on Skill Development Training under PMJVK kalpui turin kum hnih atan hlan a ni a, term chu June 22, 2020-ah a tàwp avangin Mamit DC thuneihna angin in leh a chhunga awm zawng zawng chu LESDE hnenah hlan a ni.

DAWNTISEI

Islam sakhua sawichhiaa puh Pakistan courtroom chhungah kap hlum

Pakistan-a Peshawar khuaa courtroom chhungah Nilaini khan mi pakhat, zawlnei nia inchhal chu Islam sakhua sawichhiaa puhin kah hlum a ni.

District court-a a thubuai ngaihtuah a nih laiin, Tahir Ahmed Nasem chu silaiin vawi ruk kah a nih thu police official Ijaz Ahmed chuan a sawi. A kaphlumtu pawh hi man nghal niin, Islam sakhua sawichhia leh tihmingchhetu a nih avanga kap a ni tih pawh a sawi nghal a ni, a ti.

Pakistan ramah hian Islam sakhua sawichhiat khapna dan khauh tak hman a ni a, dan bawhchhiate chu thi tura an chungthu relsak thlengin a theih a ni. He dan hmanga thi tura hremna pek hi la awm lo mah se, Islam sakhua leh zawlnei Mohammed-a sawichhetua puhte chu mipui thinrimin an tihhlum an awm fo thung. Kum 1990 aṭang khan mi 77 vel chuan hemi kaihhnawihah hian tihhlum an lo ni tawh nia sawi a ni.

Naseem pawh hi zawlnei nia a inchhal avangin he dan hi bawhchhiaah puh a ni a, kum 2018 khan man a ni. Nilaini khan a thubuai ngaihtuah laiin courtroom chhung ngeiah kahhlum a ni ta a ni.

Share this Post

Login to comment

No Comments