Vanglaini - US-in Germany-a sipai 11,900 te sawn dawn

KHAWTHLIR

Zira'n hmanpui

Minister R Lalzirliana chuan nimin khan MSU Sub-Headquarters, Saitual-in kumina HSLC leh HSSLC-a ti ṭhate chawimawina hun Saitual College-a an buatsaih a hmanpui. Bialtu MLA R Lalzirliana chuan, sorkar hna leh hna dangte a vàn tawh avangin, mi dang aia thawhrim leh hrât lâk a ṭul thu a sawi. Zirlai chawimawite chu - HSLC distinction leh first division-a pass mi 35 leh HSSLC distinction leh first division-a pass mi 34 an ni.

Negative vek

July 29, Nilaini khan Lunglei Civil Hospital laboratory-ah TrueNat-PCR hmangin swab sample 30 endik a ni a, Rapid Antigen Test hmangin Aizawlah sample pakhat leh Serchhipah panga endik a ni bawk. Heng zingah hian Covid-19 vei hmuh chhuah an awm lo.

Sample 200 endik

Nimin khan ZMC Covid-19 Laboratory-ah mi 200 velte swab sample endik a ni a, he thu ziah lai hian result a la chhuak lo. Sample endikte chu State Referral Hospital-a awm sate bakah, Aizawl, Mamit leh Serchhip aṭanga an dawnte a ni.

PPE siam zirtir

UNDP, EXIM Bank leh ZOHANDCO-te chuan July 7-30 chhungin ZOHANDCO building-ah puan tahtute tan personal protective equipment (PPE) kit siam zirna - Training for Product diversification for Weavers' of Aizawl District an buatsaih. Training-in a tum ber chu - puantah lama eizawng mi harsate thiamna thar neihtir a, Covid-19 leng karah eizawnna/sum lak luhna ṭha an neih theih nana buatsaih a ni.

Thisen pe

Nimin kha Ṭhalai Kristian Pawl din champha, ṬKP Day a ni a, he ni pual hian hmun ṭhenkhatah ṬKP-te'n thisen an pe. Lawngtlai Kanan unit leh Peniel Thingkah unit-te'n Lawngtlai District Hospital tan BCM Kanan Kohhran sunday school hall-ah thisen unit 24 an pe a, petute mipa 22 leh hmeichhia pahnih an ni. Siaha West Bial ṬKP pawhin Siaha District Hospital tan thisen unit 22 an pe a, petute mipa 19 leh hmeichhia pathum an ni.

SRH-ah 18 awm

State Referral Hospital (ZMC)-ah nimin khan Covid-19 vei mi pakhat dah luh thar a ni a, Covid-19 vei rinhlelh thilah mi pakhat dah luh a ni bawk. SRH-ah hian hripui vei mi 18 enkawl mek an ni a, ICU-ah mi pahnih, SICU-ah pakhat leh Isolation Ward-ah mi 15 an awm. SRH-ZMC Bulletin tarlan danin, ICU-a enkawl pakhat zawk chu ventilator hmantir a ni a, pakhat zawk erawh chuan hma a sawn zel. Isolation Ward-a awm zingah khawsik leh thawhah nasa vak lo nei pahnih an awm bawk.

Building inhlàn

West Phaileng-a Industrial Training Institute (ITI) building, Multi Sectoral Development Programme (MSDP) hnuaia sak chu Mamit DC Dr Lalrozama'n nimin khan LESDE department-ah a hlân. In hi Mission Foundation Movement, Bawngkawn, Aizawl hnenah June 23, 2018 khan Special Project on Skill Development Training under PMJVK kalpui turin kum hnih atan hlan a ni a, term chu June 22, 2020-ah a tàwp avangin Mamit DC thuneihna angin in leh a chhunga awm zawng zawng chu LESDE hnenah hlan a ni.

DAWNTISEI

US-in Germany-a sipai 11,900 te sawn dawn

United States chuan Stuttgart, Germany-a European military headquarters a neih chu Belgium-ah sawn a tum a, hei vang hian President Donald Trump thupek angin Germany-a US sipai 11,900 te chu sawn an ni dawn.

Germany-a US sipai awm zinga 6,400 chu US-ah koh haw an ni dawn a, 5,600 dawn chu NATO ram dangah sawn chhuah an ni dawn tih defence secretary Mark Esper chuan a sawi. US-in Indopui II-na hnu lama a thawhpui hnai leh sumdawnna kawnga a thawhpui ṭha tak ram, Germany-ah hian America sipai 24,000 vel chu an la awm chhunzawm dawn tho a ni.

US hian Germany-ah sipai leh civil mi hnathawk 47,000 vel a nei mek a, heng mite hi base, headquarters leh installation hrang hrangah an awm a ni.

Army leh Air Force base-a duty hi mi 36,000 vel an ni a, National Guard leh Reserve force 2,600 an awm bakah, Defence department leh service hrang hrangah thawk, civil mi 12,000 an awm bawk.

Share this Post

Login to comment

No Comments