MPSC-in an kum 25 tlin an lawm

Mizoram Public Service Commission (MPSC) chuan, nimin khan MPSC Examination Hall-ah an kum 25-na (silver jubilee) an lawm a, minister Lal Thanzara'n a hmanpui.

Jubilee lawmna inkhawm hi MPSC chairman PC Lawmkunga'n a kaihruai a; Lal Thanzara chuan "State civil service hrang hrang exam buatsaihin mi eng emaw zat lak a ni tawh a, tunah phei chuan Combined Civil Services Exam-te buatsaih a ni tawh. Zâwi zâwiin hma kan sawn zel a ni tih hmuh hian a lawmawm tak zet a ni," a ti.

Lal Thanzara chuan, MPSC chu kum 25 chhung sawiselna awm miah loa kalpui a ni tih sawiin, "Hei hian a bul ṭan dan a fuhin, a hnu zela mawhphurhna pawimawh tak rawn chelh zuitute inpekna leh dikna an kenkawh zelzia a tilang chiang hle," a ti a; MPSC chu a din chhan ang ngeia dik leh felfai taka hna a thawh chhoh zel theihna atan duhsakna a hlan.

MPSC hi May 1, 1991-ah din ṭan a ni a, tunah hian district tinah exam centre an nei tawh a ni.