Vanglaini - SAfrica, Mexico leh US-ah hri kai tam ber ni thleng

KHAWTHLIR

Chhawmdawlna pe

Covid-19 dona atana mi inphalte'n Saitual DC hnena an thawh cheng nuai 5.06 chu Ningani khan district bawrhsap VL Hruaizela'n chhungkaw 117 hnenah chhawmdawlna atan a hlân. VL Hruaizela chuan, tlawmngai páwl hrang hrang, kohhran leh mimal ṭhahnemngaite'n mi dang tana malsawmna ni tura thilpek hlu tak an pe ṭhin chu lawmawm a tih thu a sawi.

3rd IR-in tanpui

Mizo 3rd IR Batallion-a D Company, tuna Jakhalabandha, Assam-a awm mekte chuan Rongmongvei khuaa chhungkaw harsa zual 63 hnenah nimin khan buhfai an sem. 3rd IR police-te chuan Covid-19 vanga inkhàrkhip puan a nih hnuah chhungkaw 500 chuang hnenah ṭanpuina an pe tawh.

Sangha chi sem

Fisheries department chuan Ningani leh nimin khan SEDP hnuaiah Lawngtlai district-a sangha khawitute hnenah 50% subsidy-in sangha notê an sem. Sangha khawitute hnena subsidy-a sangha notê an pek chhuah hi 90,000 vel a ni a, a man pumpui aṭanga a zatve chu department-in tumsakin, beneficiary-te'n pakhat Rs. 2 (50% subsidy) zelin an khul.

Ambulance pe

West Tuipui bialtu MLA Nihar Kanti Chakma chuan July 8, Ningani khan MLA fund aṭanga a lei ambulance pakhat Tlabung damdawi-in hnenah a pe. NK Chakma chuan, a bial mipui hriselna dinhmun chawi kân a ngai tih sawiin, "Hmanrua leh kháwl indaih tâwk loh vangin thawktute'n harsatna an tâwk fo ṭhin," a ti a, ambulance a pek tâk chu ṭangkai taka hmang turin damdawi-ina thawkte duhsakna a hlân.

Covid-19 vei lo

July 9, Ningani khan Lunglei Civil Hospital laboratory-a TrueNAT hmanga mi 22-te swab sample endikah Covid-19 vei an awm lo. Ningania endikte hi BSF mi leh sa Covid-19 veite'n an kai chhàwn theiha ngaih - PC Pharmacy-a thawk te, Bazar Venga chawhmeh zuartute leh Rahsi Venga chawhmeh zuar, BSF hoin thil leinate an ni a; Lawngtlai district mi hripui vei pahnihin Lunglei Bazar Venga bike kê an siamtirna hmuna thawkte an tel bawk.

DAWNTISEI

SAfrica, Mexico leh US-ah hri kai tam ber ni thleng

Khawvela hripui leng mek chuan ziaawm lam a pan thei lo a, nitin hri kai thar leh hri vanga thi an la pun belh zel.

Nimin thleng khan khawvel pumah hri kai hi mi 1,24,09,567 an awm tawh a, mi 5,57,847 in an thihpui tawh bawk.

South Africa, Mexico leh US-ah chuan Ningani khan an rama hri kai hmuh chhuah thar tam ber ni a ni leh. SAfrica-ah hri kai hmuh thar mi 13,674 awmin hri kai hmuh chhuah tawh hi 2,38,339 an tling tawh a ni.

Mexico-ah pawh hemi ni hian hri kai hmuh chhuah thar 7,280 an awm a, heng mite nen hian an rama Covid-19 kai hmuh tawh hi mi 2,82,283 an awm tawh. Khawvela hri kai tamna leh hri vanga thi tamna ber ram, US-ah pawh hri leng hian ziaawm lam a la pan lo a, Ningani khan kai thar mi 65,551 hmuh chhuah leh niin ni khata hri kai hmuh chhuah tam ber ni a thleng leh a ni. US-a hian hri kai hmuh tawh hi mi 32,20,500 an tling tawh a, mi 1,35,828 in an thihpui tawh a ni.

Share this Post

Login to comment

No Comments