Thawhho loh chuan Covid-19 do hneh theih a ni lo ; WHO director-general

WHO director-general Dr Tedros Adhanom Ghebre­yesus chuan khawvel ram puma leng mek, Covid-19 chu thawhhona nen lo chuan hneh theih a ni loh thu a sawi. 

Nilaini khan kum 70 lai WHO member ni tawh US chu nakkum July 6-ah  WHO member a nihna aṭangin ban a tum tih United Nations (UN) chuan a tarlang a, hemi chungchanga press conference a neihah WHO hotu Dr Tedros chuan hri dona kawnga thawhho a pawimawh thu sawiin, Covid-19 leng mek chu khawvel mipuite hmelma inang neih a ni tiin, inṭhendarh chung chuan an hneh thei dawn lo tih a sawi a, he thu a sawi lai hian lungchhiaiin a mittui a tla hial a ni. 

Tedros chuan he hri leng hi eng ram tan pawh hmelma a nih thu a sawi a, he hri hian khawvel ram hrang hrangte kan ṭan ho na a ṭha tawk em tih min enchhin a ni, a ti. "Kan inṭhenhran chuan he hri hian bu a khuar zel dawn a, nunna tam tak a lak belh zel thei a ni," tiin Tedros chuan a sawi bawk.

US-in WHO member a nihna aṭang inhnuhdawh a tum chhan hi hri leng dona kawnga WHO  hma lak dan a duh loh vang a ni a, WHO chu China lam aṭang leh, China-in an duh dan anga a thunun theih niin a sawi a, hei vang hian vawi tam tak a lo sawisel tawh a ni. 



Share this Post

Login to comment
No Comments