Chhiatna tuarte chhawmdawlna tur SDRF aṭangin pek chhuah a ni

Mizoram sorkar chuan tun hnaia ruahsur, rial tla leh thlipui tlehin chenna in a tihchhiat tuarte chhawmdawlna atan State Disaster Relief Fund (SDRF) aṭangin cheng nuai 450 a pe chhuak.

Tarlan tawh angin, kumin March 31 aṭanga April 2 inkara ruahsur, thli tleh leh rial tla avangin Mizoram hmun hrang hrangah chenna in 2,311 a chhia a; in chhia 2,311 zinga 335 chu luah zui tlak lohin a chhe vek a, in 1,976 chu a chhe vek lo thung.

Chenna in chhiate chhawmdawl thuai an nih theihna atan SDRF nodal department Disaster Management & Rehabilitation (DMR) department chuan hma an la nghal a, DMR minister K Sapdanga hoin April 1, 2024 khan department official-te nen an ṭhukhawm a ni.

Chhiatna tuarte chhawmdawlna atan SDRF aṭanga rîkrum thila rângvâ leh tarpauline lei nghal tura tih a nih angin order siam nghal a ni a, rangva eng emaw zat a thleng tawh. Hei bakah hian, bawrhsapte'n SDRF sum an kawl sa ṭheuh aṭangin emergency-in a theih ang angin chhiatna tâwkte hnenah ṭanpuina sum an pe chhuak mek zel.

DMR department chuan SDRF sum pawh rîkrum thil a nih avangin a dil belh nghal a, Finance department chuan April 4, 2024 khan a pe chhuak. DC-te hnenah a rang lama pe chhuak turin hmalak nghal niin, April 6, Inrinni khan DC tin hnenah pek a ni.

DC-te hnena sum pek chhuah hi Respond & Relief atan cheng nuai 225 leh Recovery & Re-construction atan cheng nuai 225 a ni a, a vaiin nuai 450 a ni.

SUM PEK CHHUAH DAN (Cheng nuai biin)

1. Aizawl 100

2. Lunglei 50

3. Siaha 20

4. Champhai 40

5. Kolasib 40

6. Serchhip 40

7. Lawngtlai 30

8. Mamit 30

9. Saitual 40

10. Hnahthial 30

11. Khawzawl 30