Iran leh Syria-in thawhdunna tur inremna an ziak

Iran leh Syria chuan Nilaini khan sipai chakna lamah leh venhimna kawngah zau taka thawhdunna tur inremna an ziak tih Iran semi-official Fars news agency chuan a tarlang.

Iranian Armed Forces Chief of Staff Mohammad Baqeri leh Syrian Defense Minister Ali Abdullah Ayyoub-te chuan Syria khawpui Damascus-ah inremna hi an ziak niin an tarlang a, he inremna hnuaiah hian Iran chuan Syria air defence system nasa takin a thuam chak dawn tih Baqeri chuan a sawi.

"Kan inremna hian US aṭanga nawrna awm dona kawngah pawh nasa zawkin ṭanrualna min pe dawn a ni," tia sawiin an ram leh a chhehvela mite chuan US chu an ngaithei lo hle tih a sawi bawk.

Iran commander chuan Turkey tana thuchhuah siam bawkin, Syria nena an inkar chu inbiakna hmanga chingfel turin a ti.

Syrian Defense Minister Ali Abdullah Ayyoub pawhin US chuan Iran, Syria leh an resistant front-te chu an ke bulah an kun tir thei lo tih a sawi ve bawk.

Kum 2011 aṭang tawh khan Iran leh Syria sorkar hi an ṭangrual tawh a, hel beihna kawngah pawh nasa takin Iran hian a lo pui tawh a ni.



Share this Post

Login to comment
No Comments