MCC bawhchhiatna awm lohna ram

Mizoram Lok Sabha inthlannaa returning officer Nazuk Kumar, Aizawl district election officer chuan press mite zawhna a chhànaah, Lok Sabha inthlan tura inbuatsaihna kal mekah tun thlengin Model Code of Conduct bawhchhiatna kaihhnawih zualkona thu an la dawn loh thu a sawi.

India ram hi khawvela democracy ram, inthlang ram a nih angin, India ram pum roreltu turte thlan ṭhin a nih bakah, state leh union territoty tinah inthlan hrang hrang a awm ṭhin.

Mizoramah pawh inthlan hrang hrang a awm a, chu'ng inthlante chu duhthusam ang taka felfai ni vek lo mah se, India ram hmun dangte ngaihtuahin a felfaiin a rálmuang hle. A chhan ber chu Pathian ringtu kan nihna vang a nih a rinawm a; kohhran te, MPF-te leh páwl hrang hrangte hmalakna rah chhuah pawh a nih a rinawm.

State dangahte nasa tak takin an inbei a, tharum thawhna a thleng fo a, thih phah leh hliamte pawh an awm fo; hetiang hi Mizoramah chuan a awm lo tih theih a ni a, a lawmawm. Hun lo la kal zel turah pawh rálmuang taka kan inthlan zel theih nan mawhphurhna nei bik an awm rualin, mi tin kan pawimawh vek a ni.

Inthlanna felfai, thianghlim, zalen leh rálmuang nei turin candidate-te leh political party mi leh sate zahawm tak leh mawi takin inzuar se, kawng dik loah mipui hruai tum lo se, Kristian, Pathian ringtu an nihna lantir ngam se. MCC hi bawhchhiat tur ni loin, zawm tur a ni tih hriain zâwm zel thei se. Mipui pawhin thil dik lo leh ṭha lo te, Pathian leh a kohhrante duh lo thilte chu hnâwl ngam ila. MCC bawhchhiatna awm miah lohna ram nih i tum ang u.

Ram ṭhenkhatah chuan mipui an zalen lo a, mipuiin ram hruaitu tur an thlang thei lo. Keini erawh chuan zalen takin kan ram hruaitu tur kan thlang thei a, kan vannei hle. He kan vanneihna leh kan chanvo pawimawh tak hi hmang ṭangkai ṭheuh ila, Lok Sabha inthlanpuiah pawh hian voter zawng zawngin vote thlâk ṭheuh i tum ang u.