Arunachal : Chief Election Officer-in Kristian pawl insawi fiah turin a hriattir

Arunachal Christian Forum (ACF) chuan tun hnaia Congress an thlawp thu an sawi chu Model Code of Conduct bawhchhiatna nia ngaiin Arunachal Chief Election Officer chuan insawi fiah turin a hriattir.

ACF hian April 1-a social media-a thu an chhuahah Congress MP candidate pahnih Nabam Tuki, Arunachal West constituency a ding tur leh Bosiram Siram, Arunachal East constituency a ding turte chu inthlanpui lo awm turah an thlawp thu an tarlang. Social media lama an thehdarh hma hian March 26 khan hriattirna pangngai an lo tichhuak tawh bawk. ACF hian an mi leh sate chu an mi thlawpte tlin theih nan vote turin an chah a ni.

Arunachal Chief Election Officer chuan ACF chet dan chuan Religious Institutions (Prevention of Misuse) Act, 1988 a bawhchhiat thu a sawi. He danah hian sakhuana behchhan pawl hrang hrangte hmun hma leh thil neihte chu politics nena inkaihhnawih thilah hman phal a ni lo tih ziah lan a ni. ACF chuan he dan bakah hian Election Commission of India (ECI)-in inthlanna dik leh felfai a awm theih nana a duan, Model Code of Conduct (MCC) chu an bawhchhe bawk a ni, a ti.

Election Officer hian an chet dan leh thil tih sawi fiah turin a phut a, sakhuana remchangah hmanga politics-a sawi neih ve an tum avangin ACF chu insawi fiah tura tih an ni. CEO hian ni thum ral hmain an insawi fiah lo a nih chuan dan anga hmalak a nih tur thu a sawi.