Spain Masters lamah Sindhu leh Srikanth

Paris Olympic awm kum a ni a, badminton player ten infiamna liana inlan phak tumin thapui an thawh a ngai. Tun kar chhunga khelh tur Madrid Spain Masters tournament-ah PV Sindhu leh Kidambi Srikanth te an inlan dawn.

Spain Masters-ah hian season hmasa khan Sindhu-i'n final a lut a, kuminah hian seeded pahnihna niin champion tura beisei zinga mi a ni leh dawn, a match hmasa berah Canadian nula Wen Yu Zhang a hmachhawn ang.

Kum 28 mi Sindhu hi tun dinhmunah world number 11 a ni mek a, a ranking aṭanga teh chuan Olympic khel turin a tling chiang sa - a vawi thum nana medal la tur erawh chuan tun hnai a khelh danah siamṭhat ngai a nei tam ve hle.

India tlangval Srikanth chu seeded pasarihna a ni thung dawn a, ani hian a match hmasa berah chuan qualifying aṭanga invawkai a hmachhawn thung dawn a ni.

Tun season chhungin Srikanth tan tun ṭum hi tournament pakuana a ni dawn, tun dinhmunah world number 27 a nih avangin hmasawn a mamawh - Olympic khel tur chuan world number 16 chin nih a ngai.