Alcaraz tan hna a la awlsam

Carlos Alcaraz chuan harsa vak loin a khingpui Gael Monfils chu a hneh a, nimin zing khan Miami Open khelh laiah last 16 a inhlangkai a, a match lehpekah chuan Lorenzo Musetti a hmachhawn leh ang.

Hard Rock Stadium-a inkhelah Spanish tlangval hian 6-2, 6-4 in hnehna a chang a, kum 37 mi Monfils tan dan theih a ni lo - a khingpui in a nawrna lak aṭanga inven tum ngar ngar mah se a tlin ta bik lo a ni.

World number 1 Alcaraz chuan, "Infiammi ropui tak a ni, ka ball vuak phei apiang kha sir tak takah pawh ni se a lo la hman zel, a vanglai a pelh hnuah pawh player ṭha tak a ni," tiin a khingpui Monfils a fak.

Ama khelh dan chungchang sawi zuiin Alcaraz chuan, "Ka hliam dam hnuah ngaiawh leh tumin theihtawp ka chhuah a, a bik takin forehand ṭha taka ka vaw leh thei khan min tihlim.

"Match tin mai hian hmasawn ngaihna lai ka nei zel a, mipui lamin min beisei ang thlapa khel chhuak leh turin theihtawp ka chhuah mek zel a, hun rei lote hnuah ngai ka awh leh ka beisei," a ti.

Alcaraz leh Monfils te inkhel hi a hmunah Neymar, Jimmy Butler leh Juan Martin del Potro ten an en. Alcaraz chuan, "Infiammi ropui tak takten a hmunah min en reng tih hriat chuan boruak a danglam.

"Kan inkhel min en avangin ka lawm," a ti. A match lehpeka a hmachhawn tur Musetti-a lakah chuan dawhthei leh thinnel taka match a khelh a ngaih tur thu a sawi bawk.

Italian tlangval Musetti hian inkhel dangah Ben Shelton chu 6-4, 7-6(5) in a hneh. Musetti-a'n tualchhung tlangval service hi vawi hnih a chhuhsak a, inkhel inhnehtawk takah a vannei zawkah a ṭang.

Inkhel dangah Alexander Zverev chuan Christopher Eubanks lakah fiahna hautak a hmachhawn a, harsa angreng tak 7-6 (7/4), 6-3 a hnehna changin last 16 a inhlangkai ve bawk.

German tlangval Zverev chuan, "Min nawr buai hneh hle mai a, ka game pangngai pawh ka khel hleithei lo. Baseline aṭanga point hmuh tumin ka bei ta ngat ngat mai a ni," a ti.

Seeded palina Zverev hian a match lehpekah chuan Karen Khachanov a hmachhawn dawn, seeded 15-na Khachanov hian inkhel dangah Francisco Cerundolo chu 6-1, 5-7, 7-6 (7/5) in a lo hneh ve thung a ni.

Player langsar dang Alex De Minaur leh Hubert Hurkacz te pawhin an khingpui ve ve hnehin last 16 an inhlangkai ve bawk. Miami Open-ah hian world number 1 Novak Djokovic chu a inlan ve lo.