Number 1 Swiatek a chak lo

Hmeichhe tennis world number 1 Iga Swiatek chu nimin zing khan Miami Open fourth round-ah a chak lo. Swiatek hi Ekaterina Alexandrova lakah 6-4, 6-2 in a tlawm zawkah a ṭang.

Russian nula Alexandrova hian attacking game hmuhnawm a khel a, a tir aṭanga tawp thlengin tun ṭum match bikah chuan player ṭha zawk a ni, a phu ang ngeiin a tlang.

Swiatek hma hian Aryna Sabalenka leh Coco Gauff te pawh an lo tla tawh. Tun tournament khelh laia hmeichhe huangah ranking sang zual pathumte chuan quartefinal an lut phak lo vek tihna a ni.

Grand Slam vawi li champion tawh Swiatek chuan, "Miami Open hi tun aia khel ṭha zawk tur chu ka ni, mahse mahni duh leh beisei ang ngawt hian a khelh reng theih bik loh tih a takin a lang," a ti.

Hnehna changtu Alexandrova hian a match lehpekah chuan Jessica Pegula a hmachhawn dawn. Seeded pangana Pegula hian inkhel dangah Emma Navarro chu 7-6 (7-1), 6-3 in a lo hneh ve thung.

Inkhel dangah Caroline Garcia a la che fuh zel. France nula hian world number 3 Gauff-i chu 6-3, 1-6, 6-2 a hnehin quarterfinal a lut, a match hmasa lamah Grand Slam vawi li champion tawh Naomi Osaka chu a lo hneh tawh bawk.

Tun dinhmunah Garcia hi world number 27 a ni a, a khingpui Gauff lakah a buk rit lo zawk a ni - mahse darkar khat leh minute 43 chhungin hnehna a chang thei a, atan tournament chhinchiah tlak a ni ngei ang.

Elena Rybakina erawh a chak - seeded palina Rybakina hian American nula Madison Keys chu 6-3, 7-5 in a hneh a, a match dawt lehah Maria Sakkari a tum leh dawn.

Greece nula Sakkari hi a khingpui tur Anna Kalinskaya chu malpui hliam vangin a inhnukdawk a, inkhelh hah ngai loin a tlang. Inkhel dangah Victoria Azarenka pawhin Katie Boulter chu 7-5, 6-1 in a hneh.