Vanglaini - Covid-19 vaccine a thlawna sem turin ngen

KHAWTHLIR

IAS sîksawi

Mizoram sorkarchuan tun hnai khan IAS pathum a sîksawi. Serchhip DC Dr Lalzirmawia Chhangte chu secretary atan ruat a ni a, Printing & Stationery leh Fisheries department a chang ang. Siaha DC Bhupesh Chaudhary chu additional secretary atan ruat niin, Cooperation department a chang ang a, Aizawl additional DC Kumar Abhishek chu Serchhip DC a ni ang.

Mi pali dah lut

Covid-19 vei rinhlelh thilah nimin khan State Referral Hospital-ah mi pali dah luh thar a ni a, an zinga pahnih chu nimin khan swab sample laka endik nghal a ni a, he thu ziah lai hian result a la chhuak lo. Mi dang pahnih chu vawiinah endik an ni ang. SRH-ah hian Covid-19 vei mi 15 enkawl mek a ni a, Makeshift ICU-ah mi pakhat awmin, mi dang 14-te Isolation Ward-ah an awm.

Lungleiah Swab test

June 28, Pathianni khan Lunglei Civil Hospital laboratory-ah Truenat khawl hmangin swab sample 30 endik a ni a, June 27-ah sample 31 endik a ni bawk a; endik zawng zawngte'n Covid-19 an kai lo tih finfiah a nih thu sorkar thuchhuah chuan a tarlang. LCH laboratory-ah hian Pathianni thleng khan sample 299 endik a ni tawh a, sample pahnih chu Covid-19 positive angin a hmu a, ZMC-a endik nawnnaah positive pakhat zawk chu negative a ni tih hmuh a ni thung.

Hnathawh enfiah

Kolasib bialtu MLA K Lalrinliana chuan nimin khan a bial Diakkawn VC area chhunga MLA-LAD Fund, Excluded Area Grant leh Mizoram Finance Commission Grant hmanga hnathawh a hmunah kalin a enfiah a, MLA fund hmanga sak Neuva Section YMA Chawlhbuk chu a chung siam danah duhthu a sam loh thu sawiin, steel structure hmanga nalh zawk leh tha zawka siamtha tur leh estimate pawh siam tha leh turin a ti. K Lalrinliana chuan bial chhung mipuite chu MLA fund an ta a ni tih hria a, fund hmanga hnathawhte ngaihven a, enpui fo turin a chah.

DAWNTISEI

Covid-19 vaccine a thlawna sem turin ngen

Nobel prize lo dawng tawhtu mi 18 leh ram hrang hrang hruaitu 100 chuangte chuan Covid-19 vaccine hmuhchhuah a nih hunah man nei loa pechhuak tura an ngen thu Nobel Peace Prize lo dawng tawh Mohammad Yunus chuan a sawi.

Heng mite hian mithiamte hmuh chhuah tum Covid-19 vaccine chu common good a nih thu tarlangin, hri leng tihdamna tur damdawi hi khawvel mihringte mamawh a nih avangin khawvel sorkar, pawl, sumdawng leh he hri hmuhchhuah tumnaa buaipuitute chuan an siam zawh huna a thlawna mipuite an pek theih nan an ngen a ni tiin thuchhuah an siam.

An ngenna lehkha hi United Nations Secretary-General, World Health Organisation Director-General, sakhuana lama hruaitute, corporation leh media campany-te hnenah pawh an thawn tawh a ni. Ngenna siamtute zingah hian ram khata president te, politician, artist leh international organisation hrang hrangte pawh an tel a; Desmond Tutu, Mikhail Gorbachev, Malala Yousafzai, George Clooney, Thomas Bach, Andrea Bocelli leh midangte pawh an tel a ni.

Share this Post

Login to comment

No Comments