Man United fan-ten Southgate duh lo

Manchester United nena sawizawm hlawh mek, England manager Gareth Southgate chu Red Devils ṭantuten an duh lo a, social media lamah English coach an duh lohna hi an lantir nasa hlawm hle.

Tun hnaia United-a neitu thar zinga mi Sir Jim Ratcliffe chuan Southgate hi Erik ten Hag thlaktu turin a duh nia sawi a awm a, hemi chungchang hi tun hnaiah khan United legend Roy Keane leh Gary Neville ten sawi chhuakin, Southgate hi an club hlui enkawl tura ruat a nih mai an rin thu an sawi - United fan-ten hei hi an helh hle.

United-ah hian Newcastle United sporting director hlawhtling Dan Ashworth chu Sporting Director ni turin a lut dawn a, ani hi FA director of elite development pawh lo ni tawh niin, Southgate nen an thawk dun ṭhin a, Southgate duhtu langsar a ni.

Keane chuan, "Dan Ashworth nen an lo thawk dun tawh ṭhin a, hei vang hian United nena sawizawm a ni hi mak ka ti lo," a ti a, Neville chuan, "Southgate hi Manchester United a nih ka ring ngai lo a, mahse, Dan Ashworth a rawn luh dawn takah chuan manager a nih pawhin mak ka ti lo ang," a ti ve bawk!

Southgate hian fan-ten ngainat hlawh lo mah se, England coach a nihna anga a sulhnu erawh inchhuanpui tham a ni. World Cup 1966-a Three Lions champion puitu Sir Alf Ramsey hnuah England coach hlawhtling ber a ni a, World Cup 2018-ah semifinal hruai thlengin, 2022-ah quarterfinal a thlenpui a, Euro 2020-ah final a hruai thleng bawk. Mahse, penalty-ah Italy ngam loin an tlawm thung.

Kum 53 mi Southgate hian club enkawl lamah erawh sulhnu a nei ropui lem lo. Player a nih laia a khelh ṭhinna Middlesbrough chu a club enkawl tawh awmchhun a ni a, match 151 kaihhruaiin, vawi 45 a chakpui a, vawi 43 draw neiin, vawi 63 an tlawm.

Boro hi Premier League-ah season thum kaihruaiin, 12-na, 13-na leh 19-na nihpuiin, 2008-09 season-ah hian an relegate. Championship-ah enkawl zuiin, October 2009-ah point khat leka Championship hmahruaitu an phak lo chungin, coach aṭangin ban a ni.