Hong Kong Parliament luhchilhtu mi 12-te tan inah dah dawn

Hong Kong court chuan kum 2019-a Hong Kong-a democracy phuta nawrhna nasa tak huaihawt a nih ṭuma an ram Legislative council building luh chilha beitu, mi 12-te chu tan ina dah turin an chungthu a rel.

Kum 2019 khan Hong Kong Parliament-ah hian an ram mi leh sate chungthu ngaihtuah tura China-a inthawn theihna bill put luh a ni a, hei hi Hong Kong mi tam tak chuan duh loin an pung khawm a ni. July 1, 2019 khan Hong Kong legislative council building hi nawrh huaihawtte hian luh chilhin, parliament chamber-ah hian grafitti te an ziak a ni. Court-in tan ina dah tura an chungthu a rel zingah hian; lemchan thiam, Gregory Wong, political activist, Ventus Lau leh Owen Chow, University of Hong Kong president hlui, Althea Suen te an tel.

Hong Kong court hian Parliament zah lohna leh tihbawrhbanna inhnamhnawihah puhin nawrh huaihawt zinga tel an man, mi 12-te hi a tang rei lo ber tur pawh kum li tang tura hrem a ni a, a tang rei ber tur hi kum 6 leh thla hnih a tang dawn thung a ni. 2019-a Hong Kong-a nawrh huaihawt a nih ṭum hian, mi 10,200 zet man an ni a, an zinga mi 2,937-te chu thubuai siamsak an ni.