Haiti PM Ariel Henry-a'n banna a theh lut

Haiti ram tualchhung buainain ziaawm lam a pan theih loh avangin prime minister Ariel Henry chuan Prime Minister a nihna aṭanga banna a theh lut.

Kum 74 mi, Ariel Henry hian Thawhṭanni zana Caribbean Community (CARICOM) -a ram hrang hrang hruaitute'n emergency meeting an neih hnuah a ban tur thu hi a puang a ni. An ram buaina chu tireh turin a ngen nghal bawk. Henry chuan,'Ka kaihhruai sorkar chu sorkar thlaktu tur, council thar a din veleh kan bang nghal dawn a ni. Haiti mipui zawng zawngte chiai lo tur leh, kan rama boruak ṭha tak a awm leh thuai theihna tura theihtawp chhuah ṭheuh turin ka ngen che u a ni," a ti.

Haiti khawpui, Port-au-prince-ah misual rualin sorkar paih thla tura buaina chawk chhuaka khawpui hmun hrang hrang an bei leh, tan in aṭanga tang mi sang chuang an tlan chhuah avangin Pathianni hmasa khan state of emergency puan a ni. Sorkar paihthlak tuma buaina siamte hi G9 Haitian gang intiin, Jimmy Cherizier chu an hotu a ni. Prime Minister Henry hian banna a theh lut lo a, ram dangin an thlawp zel a nih chuan civil war an chawh chhuah tur thu a lo sawi tawh a ni.

G9 Haitian gang-te'n an ram khawpui an beih lai hian Henry hi Kenya a zin lai a ni a, an rama kir hi an phalsak tawh lo bawk. Hei vang hian Henry hi US-a Puerto Rico-ah a awm mek a ni, US official-te chuan a awm chhunzawm zel pawh phalsak a nih thu an sawi.