Russia-in Ukraine drone 47 an kap thla

Russia sorkar chuan an ram chhim lam, Ukraine nen an inrina bula Rostov area velah zan khat thila Ukraine drone 47 zet an kah thlak thu an sawi.

Russia chhim lama Rostov chhehvel hi Russia sipaite'n Ukraine bei tura ral an relna hmunpui ber nia hriat a ni a, Rostov governor, Vasily Golubev chuan Russia-in Ukraine ram a lak, Azov sea-a Taganrog khua chu Ukraine drone-in an beih thu a sawi. Golubev hian drone hmanga Taganrog beih a nih thu hi social media-ah tarlangin, chhanchhuah hna thawktu pakhatin hliam a tuar a, thi erawh an awm loh thu a sawi tel bawk. Ukraine drone 47 an kah thlak chungchangah hian Russian army chuan,"Belgorod region-ah drone pakhat, Kursk region-ah drone pahnih, Volgograd region-ah drone pathum leh Rostov region-ah drone 41-te chu van lam venhim nana kan hmanraw dahte'n an kap thla a ni" tiin an tarlang ve bawk.

Ukraine drone-te hian Rostov chhehvel an beih chhan hi Taganrog-a Beriev aviation plant an bitum vang nia hriat a ni a, Morozovsk khuaa Russia military base-te chu beih an tum nia hriat a ni bawk. Drone hmanga Kursk khua beihnaah hian thuneitute chuan clinic pakhat a chhia niin an sawi.