US sorkar chuan Congress hnenah tui hnuai rocket, torpedo chu Taiwan hnenah US dollar maktaduai 180 vela hralh a nih dawn thu a hriattir.

Nilaini khan US Defence Security Cooperation Agency chuan Taiwan hnena tui hnuai rocket, 18 MK-48 Mod6 Advanced Technology Heavy Weight Torpedo leh a kaihhnawih indona bungrua, US dollar mtd 180 man hu vel hralh a nih theihna tur chu US State Department chuan a pawm tih a tarlang. 

Heng bakah hian economy leh ram humhalh chungchanga sipai leh ralthuam thuam chakna kawngah US chuan Taiwan chu a pui dawn tih agency chuan a tarlang bawk.

Taiwan president term hnih chelh mek tu, Tsai Ing-wen chuan China-in a ram chin nia Taiwan a puan chu nasa taka duh loin a hnawl thu a sawi a, Taiwan chu mahnia inrelbawl ram a ni a, a inrelbawlna chu China chuan a tichhe thei lo ang, tiin a sawi.

US-in Taiwan hnena ralthuam hralh a tum chhan hi China nen an inkar boruak a ṭhat loh vang nia sawi a awm. Taiwan hi China hian a ram chinah a la chhal tlat a, hei vang hian US chuan Taiwan indo ralthuamte tihchak a nih theih nan a pui niin media ṭhenkhatte chuan an tarlang. 

Kum 1949-a Taiwan-a tualchhung indona a thlen hnu khan, China hian Taiwan chu an ram chinah a la rinlut lui a ni. 

Share this Post