South Sudan buaina chhuakah Mi 300 an thi

South Sudan-a chibing inkara buaina chhuakah mi 300 vel chu an thi tih thuneitute chuan an sawi.

Buaina chhuahna hi Jonglei state-ah a ni a, in tam tak tihchhiat a nih bakah aid group kuta awm warehouse-te pawh tihchhiat ni bawkin hmeichhia leh ran eng emaw zat ruk bo an ni bawk. Thi zingah hian aid worker pathum an tel.

Sudan-ah hian civil war kum ruk lai awm tawh tihtawpna tur inremna chu February khan ziah a ni tawh a, hetichung hian chibing inkara buaina chhuak hi a thleng fo a, mahse tun ṭuma buaina chhuak hi a nasa ber pawl a ni. Zirchiangtute chuan February thla aṭanga buaina chhuaka thi hi 800 an tling tawh niin an sawi.

Jonglei state buaina hi kar liam ta Inrinni vel aṭang khan a inṭan tawh a, hmarchhak lam khua Pieri-ah niin BBC report aṭanga a lan dan chuan mi sang chuang chu inhumhimna zawngin ramah an biru mek bawk.

Health Worker-te chuan thi zinga tam tak hi chu silaia kah an ni tih an sawi a, hliam eng emaw zat chu an khawpui Juba lamah helicopter hmanga an hruai thu an sawi a ni. Buaina hi ran vulhtute inkara chhuak a ni a, UN special representative for South Sudan, David Shearer chuan tharum thawhna thleng ṭhin chu tihtawp thuai ṭul a ti hle tih a sawi.

South Sudan civil war-ah hian mi 3,80,000 lai chu an thih tawh rin a ni a, mahse president Salva Kiir leh hel pawl hruaitu Riek Machar-te chuan February khan ṭangrual sorkar siamna tur inremna an ziak a, heti chung hian buaina hi a khat tawkin a la chhuak reng tho a ni. 



Share this Post

Login to comment
No Comments