Khawvela hripui leng mek, Covid-19 kai chu nimin thleng khan mi maktaduai nga chuangin an kai tawh a, mi 3,28,000 chuangin in an thihpui tawh bawk. 

Nilaini khan hri kai hmuh chhuah belh hi ram hrang hrangah mi 1,06,000 awmin, WHO report-ah ni khata hri kai hmuh chhuah an tam ber ni a ni. US chu  hri kai tamna leh he hri vanga thi tamna ber ram a la ni chhunzawm zel. 

Covid-19 kawng zawh :

Dec 31, 2019 :Coronavirus leng chungchanga report hmasa ber chu Wuhan Municipal Health Commission, China chuan siamin, 'pneumonia lam chi' tiin a sawi. 

Jan. 1, 2020:US Centers for Disease Control and Prevention chuan Wuhan-a seafood market chu hri rawn chhuahna nia a rin thu a sawi a, he market hi khar zui nghal a ni. 

January 3 : Wuhan airport aṭanga zin chhuakte chu Changi airport-ah Wuhan-ah hri kai an awm vang hian screening neih sak vek an ni. 

January 4 : World Health Organisation (WHO) chuan a official twitter-ah China-in an rama pneumonia lam chi nia lang hri a leng tia a report thu a tarlang. Mahse he hri hmuhna, Hubei province khawpui Wuhan-ah chuan thihpui an la awm lo a, an natna chhan tak hi chhui chian mek a ni tiin an sawi.

January 5 :WHO chuan China-a zin khap leh insumdawn tawnna lam chi tihtawpna lam chi siam lo turin ngenna a siam. 

January 6 :Wuhan-a hri leng an chhuina hmasaah bird flu, seasonal flu, SARS leh MERS an ni lo tih hriat a ni. Hri kai hi mi 60 dawn an tling tawh a, mahse mihring leh mihringah inkaichhawn thei tih hriatna a la awm lo. 

January 7 :China thuneitute chuan hri leng, coronavirus hi a hming atan 2019-nCov tiin an phuah lailawk. 

January 11 :Wuhan damdawiina enkawl lai, kum 61 mi chu a thi a, he hri vanga thi hmasa ber a ni. China chuan hri kai zata report chu siam-

ṭha lehin, hri kai zat hi 41 niin a sawi leh. 

January 13 :Thailand-ah Wuhan aṭanga haw hmeichhe pakhat chu hri hi a kai tih hriat a ni. 

January 15 :Japan-ah hri kai hmuh a ni ve leh a, ani pawh hi Wuhan-a cheng ṭhin a ni. 

January 17 :Wuhan-ah hri vangin mi pakhat thi a awm belh leh. US chuan Wuhan aṭanga hawte chu screening a neihpui ṭan. 

January 20 :Ram eng emaw zatin airport-ah screening an kalpui ṭan. China-ah hri vanga thi pathum awm tawhin, a kai mi 100 chuang an tling tawh. 

January 21 :US-ah hri kai hmasa ber, China aṭanga haw hmuh a ni a, damdawiinah dah luh nghal a ni. 

January 20-21:WHO expert-te chuan hri leng chungchang zirchiang turin Wuhan an tlawh. Hri kai mi 500 chuang awm tawhin, mi 17 in an thihpui tawh. 

January 22 :WHO expert-te chuan thuchhuah siamin, Wuhan-a hri leng an zir chiannaah mihring leh mihringah inkaichhawn theih nia a lan thu an sawi. 

January 24 : China-in khawpui ṭhenkhatah zinchhuah khapna a tichhuak. Wuhan-ah hri kai an pun zel avangin temporary hospital sak ṭan a ni.

January 26 : US sorkarin Wuhan-a America mi awmte hruai chhuah an nih tur thu a puang. France pawhin an mite hruai chhuah tumin hma a la zui bawk. 

January 30 :WHO-in Public Health Emergency of International Concern (PHEIC) a puang. Hei hi kum 2005-a International Health Regulations (IHR) hman a nih hnua WHO in PHEIC a puan ṭum rukna a ni. China bakah ram dang 22-ah hri kai hmuh an ni tawh. 

February 1 : Russia, Spain leh Sweden-ah hri kai hmuh an ni. US-in kar hnih liam ta chhung China tlawhtute an rama luh a khap. China ram pawnah  hri vanga thi report an la awm lo. 

February 2 : Philippines-ah hri kai pakhat a thi a, China ram pawna hri vanga thi awm hmasa ber a ni. 

February 7 : Chinese doctor, he hri leng chungchang warning tihchhuah tum nia sawi chu hri a kai hnuah Wuhan damdawiinah a thi. 

February 11  :Hri leng mek, novel coronavirus chu WHO in a official hmingah Covid-19 tih vuah a nih thu a puang, hei hi conoravirus disease for 2019 tihna a ni. 

February 12 :Khawvela mobile event lian ber, Mobile World Congress chu hri leng vangin ṭhulh a ni. 

February 22 :Italy-ah hri kai zinga pakhat thiin, an ramah he hri vanga thi hmasa ber a ni. 

February 27:North Korea hrek a nih chungchang zirchiangtu, UN panel chuan WHO hnenah NKorea-in hri leng lak a invenna tur damdawi leh hmanruate a thawnluh a phalsak. 

February 29 : US-ah hri leng vanga thi hmasa ber report a ni. US chuan South Korea, Iran leh Italy-a zin khapna a siam. 

March 3 : WHO-in Covid-19 kai thi zat chu khawvel pumah 3.4% a nih thu sawiin, a hmaa an lo chhut dan aiin a sang tih a sawi. Covid-19 vaccine leh a enkawlna a la awm lo a, mahse hri leng hi khuahkhirh theih a la nih thu a sawi. 

March 5 : US Congress chuan hri leng dona atan emergency bill US dollar tluklehdingawn 8.3 a pass. An rama state 14-ah hri kai hmuh an ni tawh. 

March 6 : Japan prime minister Shinzo Abe chuan South Korea leh hri len hluarna aṭanga lutte chu kar hnih chhung khung hrang zel an nih tur thu a puang a, hei hi SKorea lam chuan a sawisel nasa hle. 

March 9 : Italy prime minister Giuseppe Conte chuan hri leng vangin an ram pumah inkharkhipna a puang. 

March 11 : Meeting, joint mission leh research ṭum eng emaw zat neih hnuah World Health Organisation chuan Covid-19 chu khawvel puma hripui leng, pandemic ah a puang. He thu a puan hian ram hrang hrangah hri kai hmuh chhuah hi mi 1,26,215 an awm tawh a ni. 

Share this Post