Sindhu hoin India nulate an chak

Badminton Asia Team Championships khelh laiah, nimin khan India nula te chuan dinhmun hniam zawka an din hnuin China chu 3-2 in an lehthal a, group match paltlangin knockout stage an lut bawk.

Group W-ah India leh China chauh an awm a, group dang pathumah erawh ram pathum ṭheuh an awm. India hian match an khelh hmain knock out stage hi an lut dawn tih a chiang a, in thlahdah erawh a rem lo.

Singles match khelh hmasak niin PV Sindhu chuan Han Yue chu minute 40 chhungin 21-17, 21-15 in a hneh a, match hmasaah a chak avangin India chu dinhmun ṭhaah a dah phawt.

Mahse, India tan Tanisha Castro leh Ashwini Ponappa te inkawp an chak lo a, a hnuah Ashmita Chaliha chu world number 9 Wang Zhi Yi lakah 13-21, 15-21 in a tlawm - China lamin 2-1 in hma an hruai let daih.

Doubles khelh leh niin Treesa Jolly leh Gayatri Gopichand te ṭangdun chuan, darkar khat zet an inbeih hnuah Chinese duo Li Yi Jing leh Luo Xu Min te chu 10-21, 21-18, 21-17 a hnehin ram pahnih an intluk tawk ta chiah.

A chungchung zawk chingfel turin singles an khel zui. Inkhel pawimawhah Anmol Kharb chuan Wu Luo Yu chu 22-20, 14-21, 21-18 in a hneh, hnehna chang tur hian darkar khat leh minute 17 chhung hun a hmang hial.