Hubei province-a kharkhipna puan hlip

China thuneitute chuan coronavirus  hri len ṭanna, Hubei province puma thla hnih chhung kharkhipna a lo puan tawh chu hmun tam zawkah Thawhlehni zan zanlai aṭang khan a hlip ta.

Province khawpui, Wuhan-ah erawh chuan lockdown hi April 8 thleng hman chhunzawm a la ni ang. January 23 aṭang khan Wuhan khua hi kharkhip niin, luh leh chhuah khap a ni a, a hnuah province chhung hmun dangah pawh kharkhip chhunzawm a ni. 

Hubei province hmun tam zawka khuahkhirhna hlihna hmuna chengte chu an hriselna a ṭha tawh tih finfiah an nih chuan an awmna khua an chhuahsan phalsak an ni bawk. 

China-ah hian hri leng hian ziaawm lam a pan zel a, hetih lai hian rampawn aṭanga lut zingah hri kai hi hmuh belh an la nih reng thung. Beijing sorkar chuan ram dang aṭanga lutte chu dah hranna dan tur khauh tak a ­duang a, hmun ṭhenkhatah chuan ram dang aṭanga luh pawh an khap a ni.



Share this Post

Login to comment
No Comments