UK National Health Service pui turin mi 170,000 chuang inpe

Britain-a coronavirus leng mek dona kawnga National Health Service pui turin mi 170,000 chuang an in pe. 

NHS England national medical director Stephen Powis chuan hun harsa tak an tawh mekah, mipui­te chuan thawhhona ṭha tak an neih a ngai tih a sawi. Health emergency an thleng tawh a, midangte ṭanpuina kawnga thawk tur, volunteer an mamawh thu a sawi. Sawmna a siam hnu lawkah hian mi 170,000 chuang chu NHS pui tur hian a inziak lut nghal. 

Hri leng avanga an inkharkhip mek avang­in volunteer-te hian a mamawhte hnenah chaw leh damdawite an sem kual dawn a, damlote phurin midang nen intlawhpawh theih loha khun hrang, khawhar taka awmte chu telephone-a biain an kawm ṭhin dawn bawk a ni. 

Britain sorkarin hriselna ṭha tawk lote leh kum upa lamte chu hri leng laka an himna turin kar 12 chhung chu inkharkhip turin a lo ti tawh a, hetianga inkhung­hrang hi mi maktaduai 1.5 vel an awm mek a ni.



Share this Post

Login to comment
No Comments