Santosh Trophy final round fixtures a chhuak

77th National Football Championship for the Santosh Trophy 2023-24 Final Rounds fixtures chu January 14, Pathianni khan an tichhuak a, match zawng zawng hi Golden Jubilee Stadium-ah vek khelh a ni ang.

Arunachal Pradesh chuan a vawi khat nan Santosh Trophy final round a thleng a, inelna hi Yupia, Itanagar-ah February 21 - March 9, 2024 chhungin khelh a ni dawn.

Final round-ah hian team 12 an awm a, kumin inelna aṭangin quarterfinal a awm ang. Team pahnih hi group pahnihah ṭhen an ni a, a ni inkar thlakin an inkhelh chhawk ang. Inkhelh hun hi chawhma dar 10:00, chawhnu dar 2:30 leh zan dar 7:00-ah ṭhen a ni.

Mizoramin match hmasa berah Maharashtra chu February 22, Thawhṭanni zan dar 7:00-ah an hmachhawn ang a, a bak zawng chu chawhma dar 10:00-ah an khel vek ang.

Mizoram coach Lalsangzuala Hmar chuan, "Fixtures duhthusam chu a ni lo. Chawhma dar 10:00-a inkhelh hi zing dar 8:00 chhoa tuk ṭhuan ei ṭhin Mizote tan chuan a hma mah mah. AIFF-ah chuan kan zualko a, chutihrualin min thlaksak lo a nih pawhin kan theih anga ṭha khelh kan tum ang," tiin Vanglaini a hrilh.

Mizoram hi coach Lalsangzuala Hmar, manager K. Lalenghluna (Maenga) leh assistant manager Lalzarzova ten an ho dawn a; January 10, Nilaini aṭang khan zing tin RG Stadium-ah an training a ni.