Khawvel puma hri leng mek novel coronavirus disease, Covid-19 dona kawnga khawvel kan inlungrual theih nan ram hrang hranga innghir­nghote chuan inkahhai puang thei vek turin United Nations Secretary-General Antonio Guterres chuan a ngen.

"Tunah chuan he hri dona kawnga kan ṭan tlan a hun tawh tak zet a, inhuaa indo hman kan ni tawh lo. Kan indo loh chuan nunna kan chhanhim tihna a ni. Hri leng mek dona kawnga thawk ho thei turin eng ram pawh kan inhawn a ngai a ni. He hri hi kan hmelma chu a ni a, he hri hian ram leh hnam, chi leh sakhuana a thliar hrang chuang lo, chuvang chuan khawvel ram zawng zawng kan ṭan tlan a hun tawh tak zet a ni," tiin Guterres chuan New York-a U.N. headquarters-a virtual press conference a neihnaah a sawi.

Pawl hrang hrangte chu an inhmelmakna leh huatna te dah bo tura ngenin, UN  hotu chuan, "Silai ri tihtawp a, laipui dintir a, thlawhtheihna hmanga inbeihna te tihtawp a hun ta e," tiin a ngen. Guterres chuan a Special Envoy-te chuan inkahhai te puan a ni a, a taka kalpui an nih ngei theihna turin hma an la dawn tih a sawi bawk. 

Hri leng mek chu tual­chhung indona avanga tuartu, mi rethei zawk, rualban lo leh raltlante tan a  hlauhawm zual a ni tiin, tualchhung indona avang hian ram tam tak health-system chu a tlachhe tawh a, theihtawpa ṭan ho loh chuan tun aia chhiatna rapthlak zawk hi a la thleng zel thei a ni, a ti.

Share this Post