Zaninah Inter District Junior C'hsip kickoff

MFA Inter District Junior Boys Football Championship 2023-24 kickoff chu zanin dar 8:00 hian Chanmari YMA Hall-ah neih a ni dawn. MSSC chairman John Ṭanpuia chu khuallian a ni ang.

Inelna hi January 16, Thawhlehni aṭangin RG Stadium-ah khelh ṭan a ni dawn.

Mizoram chhunga district 11 chu inelnaah hian group paliah ṭhen darh an ni. Group A-ah Lunglei, Kolasib leh Mamit an awm a, group B-ah Serchhip, Khawzawl leh Saitual, group C-ah Lawngtlai, Aizawl leh Hnahthial an awm.

Group D-ah Champhai leh Siaha chauh an awm a, group tin aṭanga pahnihin quarterfinal an luh dawn avangin knockout stage an lut sa. Chutihrualin group-a pakhatna tur zawk zawn nan vawi hnih an inkhel ang.

Group stage hi January 19, Zirtawpniah khelh zawh a ni dawn a, knockout stage hi January 22, Thawhṭanniah khelh ṭan a ni dawn. Final hi January 26, Zirtawpniah khelh tur a ni.