A thiamna zawng zawng nen De Bruyne a rawn kir

Manchester City-in Inrinni zan khan St James' Park-ah Newcastle United an tlawh a, an thiamzia an lantir. Bernardo Silva hmangin goal hmahruai an khung a, inkhel an thunun bawk. Mahse, Magpies-in mak takin Alexander Isak leh Anthony Gordon te hmangin minute thum chhungin goal hnih an khung a, inkhel kalhmang a danglam ta daih.

Pep Guardiola kaihhruai City an buai a, minute 69-naah Kevin de Bruyne a rawn lut. KDB hian a thiam a la theihnghilh lo a, ropui taka si phurh sutna goal a khung hnuah injury time-ah pass ṭha bik rawn neiin Oscar Bobb-a'n mikhual team tan chakna goal a khung.

Premier League hnuhnung paruka vawi nga champion thei Man City hian match 20-ah point 43 hmuin hmahruaitu Liverpool point hnih chauhin an pha lo a, champion tura rin kai ber an ni leh ta.

City an thiam, mah se

Man City-in January thla chhung chu an goal khung khawl Erling Haaland an chhawr theih a rinawm ta lo a, Norwegian striker tel lo pawhin an thiamzia an pholang. First half-ah KDB a awm lo chungin pawhin City hian Newcastle hi an kat thei a, inkhel an thunun hle.

An phu angin minute 26-naah Bernardo Silva-a'n a khung a, mual dinglam aṭanga Kyle Walker-a cross chu Portuguese midfielder hian mawi zetin a khenglut. City hian inkhel bul an ṭan ṭha a, chutihrualin keeper Ederson chu inhliam vangin minute riatna lekah Stefan Ortega-a'n a thlak. Hetah hian Sean Longstaff-a'n goal a khungah a inngai a, offside vangin pawm a ni lo - Ederson erawh a inhliam thung.

City khingpui Newcastle hi team ṭha an ni miau a, chetsual vawi khat a pawi. Minute 35-naah Bruno Guimaraes-a'n fing takin ball a vawrh lut thut a, City tlarhnung pawp zeuh hi Brazilian midfielder hian a hmu fuh tlat. Alexander Isak-a'n khalh lutin substitute keeper Ortega venah ṭha zetin a khung.

Minute hnih hnuah Dan Burn-a ball vawrh luh chu Anthony Gordon-a'n mual vei lam aṭanga khalh lutin angle zim tak aṭangin a hlai lut a, St James' Park thawm a ring hle. First half-ah khel ṭha zawk City chu 2-1 in an hnufual.

A hming chu KDB

City-in point hmu lo a, haw an tum lo. Second half-ah na takin an nawr a, Julian Alvarez-a'n goal khung dan a theihnghilh. Argentine forward hian tun season Premier League-ah goal ruk khung tawh mah se Magpies lakah erawh khung a harsat a, goal ruaka ngaihah pawh a khung lo.

Bench-ah KDB a ṭhu a, Pep-a'n a luhtir mai lo. Minute 69-naah De Bruyne a rawn lut a, freekick a rawn pet nghal a, pet ṭha hran lo mah se team chhunga a thuzia a rawn lang nghal.

Minute 74-naah De Bruyne thiamna a rawn lang ta a, Belgian midfielder hian Newcastle lam hnaihah ball a chang satliah emaw tih laiin goal lamah a la a, box pawn aṭangin defender Fabian Schär kap karah pet lutin goal kilah a lut.

City-in nawr chhunzawm mah se goal an khung lawk lo. A hmaa ball a channa hnungah KDB-a'n ball a chang a, ball tlawh sawn zeuhin box chhungah a pet lut. KDB hian ball mawl a vawrh lo a, Oscar Bobb-a tlan lut a hmu tlat. Kum 20 mi Bobb a thiam ve bawk a, ṭha taka a lak thlak hnuah keeper Martin Dúbravka bumin 'cool' zetin a pet lut.

A lung a leng

Kum 32 mi Kevin de Bruyne chuan, "Nuam ka ti takzet a, thil thlen dan a mak bawk. Hetiang hun ang hi ka ngai ṭhin hle. Chutihrualin na takin ka inhliam a, hun ka mamawh a ni," tiin inkhelh a châk ṭhin thu a sawi.

KDB chuan sawi chhunzawmin, "Ka mimal ngaihdanah chuan tumna tak tak vang niin ka hria. Minute 90 khel turin ka la tlin lo a, minute 30 erawh ka khel thei tawh ang. Ka chuapin ngai a la awh lo a, khaw vawt hi ka tuar bawk," tiin ngai a la awh lo tih a sawi.

Man City manager Pep Guardiola chuan, "Freekick a khung loh avang khan a chungah khan ka lawm lo hman. Kan khingpuite an chauh hnuah khan Kevin leh Oscar te kha an hlu hle. Kevin hi mi bik a ni a, Oscar-a finishing kha a ṭha bawk," tiin chakna goal khungtu leh a siamtu a fak.