IDF beihpui thlaknaah Oct. 7-a Israel beitu zinga mi a thi

Israel Defence Force (IDF) chuan Gaza Strip-a Hamas firfiak pawlte lakah beihpui thlak chhunzawm zelin, Khan Yunis-a Hamas military compound an beihnaah firfiak pasarih an thi. Thi zingah hian October 7-a Israel beitute zinga mi, Nukhba commander pawh a tel.

IDF sipaite hian Hamas member pathumte chu an compound aṭanga rawn chhuakin rawn beih an tum a, sipaite hian rang takin an lo bei let nghal niin an sawi. Israel sipaite hian Khan Yunis hmunah hian AK-47 rifle leh RPG launcher ṭhahnem tak an hmu chhuak a, Hamas-te ralthuam dahna hmun pawh an lo tichhe tawh bawk.

Nilaini khan IDF hian Hamas ho siam, leiverh chu Khan Yunis-ah hian an hmu chhuak bawk. He tunnel hi lei hnuaiah zau taka siam niin, khawpui chhunga civilian area hnuaiah siam a ni. An zir chian hnuah IDF chuan he tunnel-ah hian Hamas-te'n Israel mi an hren mekte pawh an lo dah tawh ngei tih an sawi.

IDF 98th Division chuan khawpui chhunga urban area-ah underground lam an dap mek a, Hamas-ho leiverh hrang hrangte dap hna thawkin engineering force Yahalom Unit leh special forces unit-te'n an pui. Tunnel zawn chhuah leh tihchhiat hna hi technology tunlai tak hmangin an thawk a ni. Underground combat an neih mekah hian tunnel hi 300 chuang an hmu chhuak a, ṭhenkhat chu ralthuam chhekna atana an hmante a ni.

Central Gaza lamah pawh IDF hian beihpui an la thlak chhunzawm zel bawk a, Hamas firfiak eng emaw zat kap hlum an ni.