Vanglaini - Covid-19 Method thar hman hnuah thi zat report pung

KHAWTHLIR

Bungrua hlân

Tuirial constituency bialtu MLA Andrew H Thangliana chuan a bial chhunga YMA branch hrang hrang hnenah February 12, Nilaini khan bungrua/hmanrua chi hrang hrang a hlân. MLA hian a biala YMA branch zawng zawng hnenah bawngtuthlawh, suahdúr, thîrtiang, hruizén leh silpauline pek turin a ruahman a, a thawh khatna atan Nilaini khan Thingdawl, Bualpui, Kawnpui leh Hortoki-a YMA branch-te hnenah an hlan a, nimin khan Zanlawn, Serkhan, Lungdai YMA-te hnenah an hlan leh bawk.

Lengpui-in phal lo

Lengpui khuaa tlawmngai pawl hrang hrangte chuan thuchhuah siamin, an khaw ram chhungah sa pêl, sava veh leh dan phal loh hmanraw hmanga luia nungchate man an remti lo tih an puang. An thuchhuak pawisa loa ti lui man an awm chuan thuneitute hnenah an pek zel tur thu an tarlang.

Nupui sât hlum

K Lalthanṭhuama (49), Champhai Vengsang chuan February 12, Nilaini tlai khan a nupui Lalnunziri (48) a sât hlum. K Lalthanṭhuama'n police-te hmaa a sawi danin, a nupui nen an inhau a, a nupuiin a chháng lêt chu thinrimin chempui a la a, a sât a ni. A nupui a sah hnuah K Lalthanṭhuama chu in aṭangin a tlân chhuak a, mipuiin an man hnuah police-in an la a, jail-ah dah a ni. Lalnunziri hi damdawi-in panpui a nih hnuah a hliam tuar loin a thi. K Lalthanṭhuama leh Lalnunziri te hian fa pasarih an nei a ni.

MLA-in hmanpui

Nimin khan Kulikawn YMA Hall-ah MUP Aizawl South-II Area Conference vawi 20-na neih a ni a, Champhai North bialtu MLA Dr ZR Thiamsanga, Health & Family Welfare Board vice chairman-in a hmanpui. ZR Thiamsanga chuan, upate an hlut thu sawiin, upate chu an thiamna leh tawnhriatte ram leh hnam tan pe chhuak zel turin a sáwm a, "Sorkarin The Mizoram Maintenance and Welfare of Parents and Senior Citizens Rules, 2014 hnuaiah upate tan theihtawp a chhuah zel dawn a ni," a ti.

Innovative challenge

Entrepreneurship Development Centre (EDC) leh Lawngtlai College-te chuan nimin khan Lawngtlai College auditorium-ah District Innovative Challenge on Business Solution to Sustainable Development Goals an buatsaih. He hun hi Lawngtlai College principal T Thang-

ṭhuama'n a kaihruai a, EDS project coordinator Lalrinnunga'n EDS hmalaknate a sawi. Innovative Challenge-ah hian a ti ṭha ber team-in Rs. 30,000, pahnihnain Rs. 20,000, pathumnain Rs. 10,000 an dawng dawn a ni.

Home Science Conference nei

Mizoram Home Science Association chuan nimin khan Zirtiri Residential Science College-ah General Conference vawi khatna an hmang a, Higher & Technical Education deputy secretary HL Dingliana'n a hmanpui. He hunah hian Mizorama Home Science zir chhuak tawh mi ṭhahnem tak an tel a ni. Zirtiri Residential Science College-ah hian kum 1980 aṭangin Home Science zirna hawn a ni.

DAWNTISEI

Covid-19 Method thar hman hnuah thi zat report pung

China rama hri leng mek, coronavirus Covid-19 vanga thi zat record chu diagnostic method thar hman a nih hnuah a pung chho. China-a rorellai, Communist Party of China chuan hri leng hmuhchhuah ṭanna, Hubei province-a an party hotu a ban bawk.

Hubei province official-te chuan Nilaini khan Covid-19 vanga thi mi 242 an awm belh tih sawiin, ni khat thil thua hri leng vanga thi an tam ber ṭum a ni. China ram pumah hri leng vanga thi mi 1,355 an tling tawh a, hri kai zat finfiah tawh hi mi 60,000 an tling tawh.

Communist Party chuan Hubei province-a an party secretary, Jiang Chaoling chu an province-a hri leng chung changah a hma lakna a ṭha tawk lo nia sawiin a ban a, a aiah Shanghai mayor hlui Ying Yong dah nghal a ni.

Hemi hma hian Hubei-a Communist party health commission hotu, Zhang Jin leh director Liu Yingzi te pawh ban an lo ni tawh bawk a ni.

Hri leng mek venna leh a danna kawnga hna thawk ṭha loa puh, health official eng emaw zat chu ban an lo ni tawh bawk.

Share this Post

Login to comment

No Comments