Turkey president Recep Tayyip Erdogan chuan Parliament inkhawma thu a sawiah, "Syria-in kan ram sipaite a bei leh a nih chuan khawi hmunah pawh Syria sipai awmte chu nasa takin kan bei let ve ang," a ti. 

Recep Tayyip Erdogan chuan Idlib-a observation post 12 an siam chu sawilangin, heng hmun aṭang hian inkahhai puan chu Syria sipaite chuan an zawm em tih enfiah reng a ni dawn tih a sawi. 

Kar liam ta khan Idlib hmuna Turkey sipaite chu Syria sipaiten an bei a, he inbeihna thlengah hian Turkey sipai 13 an thi a ni.

He thil thleng vang hian Turkey president Erdogan chuan an ram sipaite chu Syria sipaite'n an bei leh a nih chuan nasa tak an beih let tawh tur thu a sawi. "Observation post leh, Syria ram khawi hmunah pawh ni se, kan sipaite tihnat leh beih an nih phawt chuan, Sochi deal kan lo siam tawh pawisa loin Syria sipaite chu khawi hmunah pawh kan bei let zel dawn a ni," a ti. 

Idlib hmuna ram pahnihte inkara buaina chung chang hi Russia-ah ram pahnih palaiten inbiakna an neih hunah sawi chhunzawm a ni dawn tih Turkey foreign minister Mevlut Cavusoglu chuan a sawi.

Share this Post