Nepal-in Tiktok a khap

China ram siam chhuah, social media platform lar tak Tiktok chu khawtlang nun tibuaia puhin Nepal chuan an ramah hman a khap ve leh ta.

Nepal chuan a ram chhungah social media firm-te chu liaison office din vek tura dan thar a siam hnuah, Tiktok khap tura thutlukna hi a siam a ni.

China ram kutchhuak Tiktok hi ram hrang hrang thuneitute zingah, China sorkar nena ṭangduna data inpek chawnna hmanrua nia rinhlelhna a nasa hle a, hei vang hian ram eng emaw zatin an lo khap tawh a, an zingah hian India pawh a tel. Tun thla tir lam khan Montana chuan Tiktok hi a khap a, US state zinga Tiktok khap hmasa ber state a ni. UK Parliament pawhin he social media platform hi hman a lo khap tawh bawk.

Nepal minister for communications and information technology Rekha Sharma chuan, Tiktok chu thil ṭha lo thawndarhna platform tiin a sawi. Tiktok chu khap nghal a nih thu leh khapna dan kengkawh turin telecom thuneitute pawh hriattir nghal a nih thu a sawi bawk. Nepal ramah hian kum li chhungin TikTok kaihhnawih cyber-crime case 1,600 zet an ziak lut tawh a ni.

Hetih lai hian, Nepal ṭangrual sorkar zinga tel, Nepali Congress hotu senior Gagan Thapa erawh chuan Tiktok khap chu sawiselin, zalenna rahbehna mai a ni a ti a, thuneitute chuan khap loin hman sual a nih lohna turin ṭan an la zawk tur a ni, a ti thung.

TikTok hi Youtube leh Facebook ang em emin hmangtu ngah lo mah se ṭhalaite zingah a lar hle a, kum 16-24 inkar social media khawihtute zingah TikTok hmang hi 80% an tling hial.