Australia ram khungin khawvel tuam chhuak dawn

Australia rama ram kang nasa tak chhuaka meikhu chuan khawvel a tuamchhuak dawn niin NASA chuan a sawi. 

NASA chuan kumthar nia kangmei chhuak khu chuan South America a tuam tawh a, ni pawh a dul phah hle tih sawiin January 8 khan he meikhu hian khawvel chanve chu a tuam tawh a ni, a ti. 

US space agency chuan tunhnaia ram kang hi a nasat em avangin a khu hian stratosphere a thleng pha a, meikhu ṭhenkhat hi mel 11 thlenga sangte a thleng pha tih an sawi. Stratosphere a thlen chhoh avangin hetaṭang hian mel sang telah a darh zel dawn a, hei hian khawvel pum atmosphere thlengin a nghawng thei dawn niin an sawi. 

Meikhu hian South America van rawng lan dan pawh a tidanglam pha a, New Zealand-ah pawh air quality thlengin nghawng a nei pha tawh a ni. 

Hetihlai hian kangṭhelhtute chuan Australia rama kangmei chhuak lian ber chu Thawhṭanni aṭang khan an thunun thei tawh tih an sawi. New South Wales kangṭhelhtute chuan thla thum dawn thunun theih loha kang tawh, Sydney hmarthlang lam khawdaia ram kang, Gospers Mountain fire chu an thunun thei ta tih an sawi a, hmun tlemteah chauh kangmei hi a chhuak tawh niin an tarlang. He hmunah hian ram hectare 8,00,000 chuanga zau a kang hman a ni.



Share this Post

Login to comment
No Comments