Israel-in defence missile hlawhtling tak­in an enchhin

Israel chuan ralthuam lama hma an sawn theihnan leh an ram humhimna kawnga hma an sawn zel theih nan Pathianni khan defence missile "Iron Dome anti-missile" chu hlawhtling takin an enchhin tih Israel Defence Ministry chuan a puang.

Iron Dome anti-missile hian detection, tracking radar, battle ma­nagement and weapon control system (BMC) leh missile-firing unit (MFU) a nei tel vek a, kilometre 40 aṭanga 70 thleng a kap thei a ni. Indo huna hman theih tura ruahman anihna angin missile hmanga Israel kah tumte missile lo kap chhe thei turin he anti-missile hi duan a ni.

Kum 2010 January 10 khan Iron Dome anti-missile hi siamchhuah a ni a, indo nan a la hman tlak reng em tih enchhinna chu Israel hian a nei leh a ni. "Kum 10 chhung khan 'operational interception' hmun 2000 chuanga kan neihah, Iron Dome anti-missile hi hlawhtling takin kan lo hmang tawh a ni. Anti-missile enchhinna kan neih leh hi zaa za a hlawhtling a ni," tiin Rafael executive vice president Pini Yungman chuan a sawi.

He anti-missile hi Israel Defence Ministry hnuaia awm 'Directorate of Defense Research and Development'-a Israel defense technology company, 'Rafael Advanced Systems' leh 'Israel Missile Defense Organization' ṭangkawpina an siam a ni. 



Share this Post

Login to comment
No Comments