Musharaf thi tura hremna pek Lahore Court-in a hnawlsak

Lahore High Court chuan special tribunal-in ram phatsantua puhna thubuaia Pakistan president Pervez Musharaf hnena thi tura hremna a pek chu ram danpui kalh a ni tiin Thawhṭanni khan a hnawlsak. 

High Court chuan phat­santua puh chungchanga Musharaf thubuai ngaih­tuah a nih dan chu dan kalh a ni tiin, member pathum - Justice Syed Mazahar Ali Akbar Naqvi, Justice Mohammad Ameer Bhatti leh Justice Chaudhry Masood Jahangir awmna bench chuan a sawi. 

Islamabad-a special court chuan PML-N sorkarin kum ruk liam ta, kum 2007, November 3-a president a nih laia Mu­sharaf-a'n Constitution a suspend chung­changah ram phatsantu nia a puhna chu ngaihtuahin thiam loh a chantir a, nikum December 17 khan thi tura hremna hi a pe a ni. Special court-in Musharaf hremna tur a tihchhuahah, tihhlum a nih hmaa a lo thi a ni pawhin, a ruang chu Islamabad-a Parliament kawtah ni thum chhung khai tur, a ti a ni. Court thutlukna hi Musharaf lamṭangte bakah, Pakistan sorkar leh sipaite pawhin an sawisel a ni.

Musharaf chuan special court thutlukna hi khing letin, Lahore High Court-ah dan kalh a ni tia puang turin a ngen a ni. 

Pakistan sorkar leh Musharaf lawyer-te chuan, Lahore High Court-in thupek a tihchhuah tak avangin special court-in hremna a lo pek tawh hi awmzia a nei tawh lo tih an sawi. 



Share this Post

Login to comment
No Comments