Kerala-in Governor chungchang Supreme Court-ah thlen leh

Kerala sorkar chuan governor Arif Mohammed Khan chu mipuite chanvo rap bet zawngin a che a ni tiin, state sorkarin bill a pass tawh a pawmpuina a pek duh loh avangin Nilaini khan Supreme Court-ah a zualko. Hei hi kar hnih chhunga Supreme Court-a Governor chungchang a zualko ṭum hnihna a ni.

Kerala sorkar aiawha ding advocate, CK Sasi chuan Governor-in hmanhmawhna a nei miah lo chu Kerala mipuite dikna chanvo palzutna a ni tiin,"Governor-in rei tak chhung bill pawmpuina ziak loa a kawl tang hi ama duh thu ngeia ti a ni a, hei hi constitution article 14 palzutna a ni. Kerala mipuite'n article 21 hnuaia chanvo an neih chu a palzut nghal bawk a, a chhan chu bill a kawl tanah hian mipuite tana hamṭhatna tur tam tak assembly-in a siamte a awm a ni," a ti.

Governor-in bill pawimawh tak tak pariat a kawl tan zinga ṭhenkhat hi kum hnih aia rei tawha mi te pawh an ni. Senior advocate, KK. Venugopal pawhin Kerala sorkar-in bill kawl tan chungchanga Supreme Court hial an thleng tawh chung pawha eng tin maha Governor a la awm lo chu mak a tih thu a sawi.

Petition theh luhah hian,"Bill-ah te hian mipuite tana hamṭhatna tur thil tam tak a awm a, kawl tan a nih chhung chu mipuite hian chung chu an chang thei dawn lo a ni. Mipuite lakah hian rorelna dik lo tak pek mek a ni a, an aiawha dinga hnathawk tur legislature leh executive te pawhin kan tuar bawk. Governor-in bill pawmpuina pe loa a kawl tan hi a thuneihna leh a duh chen chen a kawl theih nia a ngai a nih chuan hei hi constitution tum kalh daih a ni," tiin an tarlang.

Nikum November 30 khan Kerala hian Kerala High Court-ah Article 200 hmanga Governor-in bill a kawl theih hun chhung dan siam tura dilna hi a lo theh lut tawh a, mahse, Kerala High Court hian a hnawl a ni. Heta petition theh luhah hian constitution article 200 chuan Governor-in a duh chuan bill hi a pawmpui thei a, pawmpui loh pawhin house-a ngaihtuah ṭhat leh turin a thawn let thei a, President hnenah a thlen thei bawk tih ni mah se, a rang thei ang bera hma la tur a nih thu tarlan a ni, an ti.

Kerala bakah hian BJP sorkar lohna state ṭhenkhat pawhin an Governor te lakah hian petition an theh lut hlawm a, hei hi bill kawl tan a nih vang tho a ni. Tamil Nadu chuan governor RN Ravi chu bill pawmpui duh lo leh thawn let duh loah an lo puh tawh a, Punjab pawhin Vidhan Sabha-in a pass tawh bill chu Governor-in a kawl tan tlat thu an sawi. April thla khan Telangana chuan Governor-in bill pawmpuina a pek duh loh chungchang chu Supreme Court-ah an lo thlen tawh bawk a ni.