Pathianni khan Brazil-a Sao Paulo khawpuia Paraisopolis hmuna 'funk dance' party neih­na­a innekbuainaah mi 9 an thi. 

He party-na hmunah hian police-te chuan misual pahnih an zawng a, misual pahnih hian police an kah vak hnuah mipui lamte zingah hian an tlanchhe lut niin, police lam chuan an sawi. 

Silai hmeh puah a nih vangin party-naa awmte chu chiaiin an tlanchhia a, an tlanchhiatna lama an innekbuainaah hmei­chhe pakhat, naupang mipa kum 14 leh mipa pasarih an thih thu thuneitute chuan an sawi a ni.

Party-naa mipuite chuan silai hmehpuah a nih hnu hian, police-te chu lung leh bottle-in an vawm a, police lam pawhin tear gas leh firing rubber bullet hmangin an lo indang ve bawk. 

Sao Paulo Military Police thupuangtu Emerson Massera chuan police-in an um misual pahnihte hi, mipui zingah hian bibo tumin an kal thu leh he party-na hmunah hian mi 5000 chuang an tel thu a sawi.

Sao Paulo-a "funk dance" party hi Brazil-ah hian a lar hle a, tradition angin an kalpui a ni. Heng hunah ṭhalai rual tam tak an kal khawmin, khawlaiah an lam khawm luih luih ṭhin. 

Share this Post