Tottenham aia lawm zawk Arsenal

Inrinni zan North London Derby-ah chak zawk an awm lo a, Tottenham-in an mikhual Arsenal lakah 2-1 a hma an hruaina veng him zo loin 2-2 in an inhnehtawk. Hun tawp hnua lawm zawk chu player 10 a khel tluan Gunners an ni.

Arsenal midfielder Aaron Ram-sey goal hmahuai khung chu Spurs lamin minute hnih chhungin Toby Alderweireld leh Harry Kane-te goal hnih hmangin an chhang let a, mahse Alexis Sanchez chuan goal khat khung ve lehin Gunners title beiseina meichher a chhi nung thar.

Arsene Wenger-a naute hian hun pawimawha midfielder Francis Coquelin hnawh chhuah a ngai chu pawi an ti hlein a rinawm. Hetihlai hian Spurs defensive midfielder Eric Dier chu Olivier Giroud lak-ah a foul vanga referee Michael Oliver-a'n a hnawt chhuak lo chu Gunners tan chanchin lawmawm a ni lo.

Inkhel chu

White Hart Lane-a Premier Lea-gue inkhelah Harry Kane a langsar nghal a, Arsenal keeper David Ospina tan hna a siamsak nghal. Mahse goal nei hmasa erawh Gunners an ni. Defender Hector Bellerin siamsak chu Ramsey-a'n mawi takin a thai lut.

Amaherawhchu, midfielder Coquelin chuan ṭul lo taka Kane a tih tluk avangin minute 55-naah yellow card pahnih hmuh vangin hnawh chhuah a ni.

Tottenham lamin player 10-a khel an mikhual an hlau lo a, Toby Alderweireld chuan minute 60-naah an si phurh sutin Kane chuan minute 62-naah angle zim tak aṭangin goal ropui khungin a team hma a hruai pui.

Spurs hian nuamsa takin point thum an hmu dawn emaw an tih hnuah beidawng duh lo Gunners tan Sanchez chuan minute 76-naah an si phurh a sut a, keeper Hugo Lloris a hawihai hle.

Eng nge an sawi?

Arsenal manager Wenger chuan, "Second half hun tam zawk kha player 10-in kan khel a, 2-1 in kan dinhmun a chhe hman bawk. Chuti chunga point kan hlawh chhuak leh thei kha a lawmawm. Coquelin kha yellow card a hmuh tawh avangin chawlhlawk lai khan ka zilh. Ka hmuh dan chuan Dier pawh kha hnawhchhuah tur a ni a, inkhel result pawh a danglam phah thei ang," tiin a sawi.

Tottenham boss Mauricio Po-chettino chuan, "Player pakhatin kan tam zawk a, goal khatin kan khung tam zawk bawk. Khati chunga point hnih kan hloh leh kha chu a lungawi thlak loh hle. Dier hnawh chhuah a nih loh chungchang chauh kha sawi tur a ni bik lo a, Hector Bellerin pawh kha yellow card vawi hnih hmu thei a ni. Referee kha khelmual chhungah chuan a thu ber," tiin a sawi.

Hmabak

Spurs hi hmahruaitu Leicester nen an inthlauhna chu point nga a ni ta a, Gunners erawhin Foxes hi point riat zetin an phak ta lo. Mahse, match kua khelh hmabak an la neih avangin team pahnih tan nomawi beiseina a la bo lo.

Arsenal hian Thawhlehni khian FA Cup fifth round-ah Hull City an hmachhawn ang a, Tottenham chu Europa League khel turin Borussia Dortmund khelmualah an zin bawk ang.

Ngaihnawm

• Tottenham hian White Hart Lane-a Arsenal an mikhual hnuhnung pariatah vawi khat chiah chak loh an nei, vawi li hnehna changin vawi thum chu an inhnehtawk.

• Premier League chanchinah Gunners leh Spurs intum tawh naah goal 137 a lut tawh a, hei hi team hrang hrang pahnih intawn tawhna bika goal lut hnem ber a ni.

• Harry Kane hian Premier League-a London Derby-ah goal 14 a khung tawh.

• David Ospina khan save vawi kua a nei a, Gunnersgoalkeeper zingah kum 2009 April thla a Lukasz Fabianski-a'n Liverpool laka vawi kua save a neih hnuah save nei hnem leh ber a ni.