Iraq Parliament-in PM banna pawm

Iraq Parliament chuan an ram prime minister Adel Abdul Mahdi banna thehluh chu an pawmsak.

Adel Abdul Mahdi hian Zir­tawpni liam ta khan a ban tur thu sawiin, Inrinni khan a banna hi a thehlut a, Pathianni khan parlia­ment chuan a banna thehluh chungchang hi ngaihtuah nghalin an pawmsak ta a ni.

Abdul Mahdi hi tuin nge thlak dawn tih a la hriat loh a, Parliament speaker chuan president Barham Saleh chu Prime Minister thar ruat turin tih a ni dawn tih a sawi.

Iraq Parliament hian Pathianni khan emergency-in PM banna thehluh chungchang hi ngaihtuah turin session an ko a, an dan neihsaah chuan Prime Minister banna chungchang ngaih­tuahna tur dan mumal tak a awm lo a ni. Mahse Parliament member-te hian supreme court ngaihdan an lak hnuah thutlukna an siam nia tarlan a ni a, an dan neihsa angin an kal dawn a nih chuan President-in bloc lian ber chu Prime Minister thar tur nomination siam tura a tih a ngai ang. 

Iraq-ah hian an ram economy siam ṭhat phutin mipuiten hun eng emaw chen nawrh an huaihawt tawh a, sorkar duh lohna an lantir zing tawh hle. Electric leh tui mumal loh vang bakah economy tlakchhiat vang te leh eirukna hluar vangtein October 1 aṭang khan duh lohna an lantir tawh a ni.

Duh lohna lantirte leh security force-te innekbuainaah mi 400 chuang an thi tawh a, hliam tuar an tam tawh hle bawk. United Nations chuan nawrh huaihawtte hi tawpsan tawh turin a ngen tawh a, mahse awmzia a la awm chuang lo a, sorkar chu bang turin nasa takin an phut chhunzawm tho. 

Pathianni thleng pawh khan nawrh hi an la chhunzawm zel a, police officer pakhat phei chu duh lohna lantirtu zinga mi Wasit pro­vince-a a thah avangin thi turin a chung­thu rel a ni a,officer pakhat chu kum sarih tang tura hrem a ni bawk. 

Pope-i'n security force-te chetdan a dem

Iraq security force-ten nawrh huaihawtte chunga thihna hial thlen thei khawpa an chetdan chuan dem a hlawh hle a, demtu langsar ber zinga mi chu Catholic kohhran hotu lu Pope a ni. 

Pathianni pawh khan Pope Francis chuan kar tina Sunday blessing a sawinaah duh lohna lantirtute na taka chhan let an ni a, mi eng emaw zatin hliam an tuar phah chuan a tina hle tih a sawi.

Pope hian nakkumah chuan Iraq hi tlawh ngei pawh a duh thu a sawi bawk. 



Share this Post

Login to comment
No Comments