Zoram Ni pualin kawng zawh

MZP bultumin March 5 (Inrinni) khan Zoram Ni pualin Aizawlah Millenium Center aṭanga Vanapa Hall thleng kawng zawh a ni.

MZP chuan March 5, 1966-ah India sorkarin jet fighter hmangin Mizoram a bomb nia sawiin, hemi ni denchhen hian March 5 chu Zoram Ni tia vuahin, he ni pual hian kum 2008 aṭang khan hun an hmang ṭhin a ni.

Kawng zawh ṭanna Millenium Centre kawtah MZP president Lalsangzuala Ngente-in thu a sawi a, "Zoram Ni hi tute emaw, political party leh pawl dang tihthinurna atan leh tute tan emaw rilru nat tharna atana hmang kan ni lo," a ti.

MZP President chuan Zoram Ni an hman chhan sawiin, "He ni hi kan ram ṭhalai, nu leh pate tan kan ram hmangaih thar lehna ni atan hmang kan ni," a ti a, thinlungah martarte an hriat reng thu a sawi.

Zoram Ni puala kawng zawh-naah hian Israel Point leh Vanapa Hall kawtah MZP adviser VL Krosshnehzova leh Denghnunate pawhin thu an sawi.

Lungleiah pawh MZP te hian Zoram Ni pual hian Mizo Dawr Ni an hmang a, an hun hman chhung zawng Lunglei khawpuia vai dawr zawng zawng khar a ni.

Lunglei MZP-te chuan thuthar thehdarhtute kawmin, Zoram Ni puala Mizo Dawr Ni an buatsaih chhan chu hnamdang huat inzirtirna atan a nih lo tih sawiin, "Mizo hnamte inlungrualna leh inpumkhatna ni atana hmang kan ni," an ti.