Europa League Liverpool leh Spurs chak zo lo; Valencia chak chiang

Ningani zan khan Europa League last-32 first leg khelh a ni a, Premier League club Liverpool leh Tottenham Hotspur-te an chak zo lo.

La Liga-a a chak hmel hmasa ber a hmuh hnuah Gary Neville-a'n Europa League-ah chak result a hlawh chhuak zui a, khualmualah Valencia chuan 6-0 in Rapid Vienna an sawp.

Goal khung lo Reds

Liverpool-in Premier League-a an match hnuhnung berah Aston Villa 6-0 in an sawp a, Augsburg khel-mualah erawh goal an khung thei lo.

Reds tan Daniel Sturridge a khel
ṭha a, hun ṭha vawi hnih lai a neih erawh goal-ah a chantir thei lo. Sunderland player hlui Ji Dong-won-a'n Augsburg tan goal post a pet per thung.

Liverpool boss Jurgen Klopp chuan, "Europe inelnaa khualmual leh-nghala draw result hlawh chhuah hi result chhia a ni lo. Goal khung theih-na hun ṭha kan nei a, kan khelh dan pumpui thlir chuan a lungawi thlak loh," a ti.

German manager chuan sawi chhunzawmin, "Ka buaina ber chu kan theihna leh thiamna enin kha aia ṭha khan kan khel thei a, mahse chutiang chuan kan khel si lo. Result ṭha nei tur chu dawhtheih a ngai a, mahse ka dawhthei lo em em bawk si," tiin chak result a duh thu a sawi.

Liverpool leh Augsburg hi Feb-ruary 25-ah second leg khel turin Anfield-ah an inhmachhawn leh ang.

Spurs chak zo lo

Fiorentina khelmuala lenglut Tottenham Hotspur-in Nacer Chadli-a penalty hmangin goal hma-hruai an khung a, mahse mualneitu team-in Federico Bernardeschi hmang-in an sut. Hun tawp thlenga goal dang a luh theih loh avangin team pahnih hi 1-1 in an inhnehtawk.

London club tan a dan pang-ngaiin Dele Alli a khel ṭha a, mah-se kum 19-a upa midfielder hi defender Nenad Tomovic laka a chet dan mawi lo avanga hnawh chhuah a nih loh avangin a vannei hle.

Spurs manager Mauricio Po-chettino chuan, "Alli hi player naupang tak a ni a, zir tur a la ngah hle. League One club aṭanga Premier League khel a ni tih hi kan hriat sak tur a ni," tiin a rawlthar midfielder chungchang a sawi.

Valencia chak chiang

Europa League match first half-a goal nga khung thei hmasa ber chu Valencia an ni ta - Gary Neville-a naute hian an mikhual Rapid Vienna chu 6-0 in an sawp a, kum 41-a tlin niah Gary Neville-a'n birthday duhthusam a hmang.

Valencia tan kum 20 leka upa Santi Mina a che ṭha a, Spanish forward hian goal hnih a khung bakah a ṭhiante thun tur vawi thum a siamsak bawk. Valencia tan Daniel Parejo, Alvaro Negredo, Andre Gomes leh Rodrigo-te'n goal khat ṭheuh an khung bawk a, Spanish club-in 6-0 in hnehna an chang.

Valencia manager Neville chuan, "Zanina kan chak result hi Valencia-a ka hun tawn tawha nuam ber a ni. Mahse, inelna a zawh hma chuan chak result ka lawm ve ngai lo," tiin lawm avanga phul hlut hun a la nih loh thu a sawi.