Insiamṭhat ngai Inter

Inter Milan-in Serie A hmahruaitu an nih zak zak hnuah tun hnaiah chak ni hmel an hmu hlei thei lo a, season thara Champions League khelh an duh a nih chuan zanin dar 1:15-a Sampdoria an mikhual hunah chetsual a thiang tawh lo ang.

Roberto Mancini nau-te hian league match 25 khelh tawh aṭangin point 45 an hlawh chhuak tawh a, league table-a palina Roma chu point hnihin an phak lo mek. League match an khelh hnuhnung vawi sarihah vawi khat chiah hnehna an chang thei a ni.

Inter hian an league match hnuhnung paruk aṭangin point ruk chiah an hmu thei a, season tir lam an match hmasa parukah kha chuan point 15 ngawt an hmu thei a ni.

Defender Jeison Mu-rillo chuan, "Season bulṭan ṭha hle mah ila thlasik chawlh hnuah beisei kan phak lo a, tumah indem tur kan awm lo. Team anga kan insiam ṭhat a ngai a ni. Italy-ah chuan team zawng zawng hi an khawng em em a, chuvangin inkhelh apiangin theihtawp chhuah a ngai zel," tiin inthlahdah thei an nih loh thu a sawi.