China-in naupangte game khelh khap hun siam

China chuan kum 18 hnuai lamten online game an khel nasa lutuk venna atan,  zan dar 11 leh a tuk zing dar 8 inkarah online game an khelh a khap. 

Naupangte hi weekdays-ah minute 90 chin online game an khelh phalsak niin, weekend leh  holiday-ahte darkar thum an khelh phalsak an ni bawk. 

Official-te chuan game khelh nasat hian naupangte hian hriselna thlengin a nghawng pawi thei hle tih sawiin, hei vang hian an khel nasa lutuk ven nan khuahkhirhna hi siam a nih thu an sawi. Hetih lai hian China hi khawvela gaming market lian ber zinga mi a ni thung.

Sorkarin naupangte tana online game khelh theih chin bithliah a siamah, kum 8-16 inkarte chuan an gaming account aṭangin thla khatah game khelh nan an ram pawisa, yuan 200 chin an hmang thei dang a, kum 16-18 te chuan yuan 400 chin an hmang thei ang. 

China sorkar chuan  gaming atchilhin ṭhalai leh kum naupang zawkah nghawng ṭha a lo neih dante sawiin, a lo sawisel fo tawh a, online game khelh theih zat pawh a lo titlem tawh bawk. 

Nikum khan World Health Orga­nization chuan gaming atchilh hian rilru lamah harsatna a thlen theih thu a vawi khatna atan a lo sawi tawh a, 'gaming disorder' tiin a sawi. 

American Psychiatry Association chuan mental disorder-ah a pawm lo thung a, internet gaming disorder tiin hei hian naupangte zirna lamah nghawng ṭha lo a nei thei tih a sawi thung. Mahse ram tam tak chuan online game khelh nasat hian hriselna a nghawng pawi thei tih sawiin, ram eng ema zatah game atchilhte enkawlna tur clinic te a awm tawh a ni. 



Share this Post

Login to comment
No Comments