Burkina Faso khawchhak lama awm Canadian Gold mining company 'Semafo' bus panga chu beih niin mi 37 an thi a, mi 60 chuangin hliam an tuar.

Semafo ta bus pangate hi silai keng ten an lo lambun nia sawi a ni. Silai an hmeh puah hma hian chil puah bomb an rap phawt nia sawi a ni bawk. 

He bus pangaah hian Sema­fo hnathawkte phurh an ni a, Nilaini khan beih an nih thu thuneitute chuan an sawi. An beihna hmun hi Boungou khua aṭanga kilometre 40-a hlaa awm a ni. 

Sipaiten he bus panga hi veng bawk mah se silai keng­te hian an bei zui tho a ni. Semafo hnathawkte hi beih an ni fo a, thla 15 chhunga Semafo hnathawkten beih an tawhna thi an tamna ber pathumna a ni.

Silai kengten bus panga an lo suasamna hmun hi Fada leh Boungou khaw inkar kalkawngah a ni a, Semafo company chuan thi chungte hi an tawrhpui thu leh an rangkachak laihna khur tak erawh chu ven himna a ṭhat tawk avangin engmah chhiatna a thlen loh thu thuchhuah an siam. 

Nikum December thla khan he bus panga an suamna hmun­ah tho hian police motor chu tu tih hriat loh silai kengten an lo suam a, hetah hian mi panga in nunna an chan. 

Kum 2015 aṭang khan Burkina Faso-ah hian Jihadist firfiakte chetna avangin in­beihna hi a thleng fo a, an ram ṭhenawm Mali aṭanga rawn kal Islamic firfiakte chuan an ram hmar lam hmun zau zawk chu an la a, hemi hnu hian Burkina Faso leh France sipai ṭangkawpte chuan beihpui an thlak a, mahse an ram hmar lamah hian thuneihna pum hlum an la la thei chuang lo.

Buaina avanga Burkina Faso ram chhuahsantute hi thla thum liam ta chhung khan, mi 500,000 bawr vel an nih thu UN Refugee Agency chuan a tarlang. 

Burkina Faso ram hi Africa khawthlang lama awm a ni a, an national language chu French  a ni. Burkina Faso ramah hian Mali ram ṭanga pem firfiak pawl al-Qaida leh Islamic State of Iraq-te avangin sakhuana lamah buaina neuh neuh a chhuak fo a ni. 

Share this Post