Vanglaini - Damdawiin aṭang Nawaz Sharif lachhuak

KHAWTHLIR

AR hotupa leh CYMA inkawm

Assam Rifles 23 Sector DIG Brig. Vinod S chuan nimin khan an hmunah Central YMA hruaitute léngah sáwmin, Mizo ṭhalaite tana an hmalakna hrang hrang a hrilh. Brig. Vinod S chuan, sipai lâk leh turah Mizo ṭhalai tan pre-recruitment an buatsaih thu sawiin, chu'ngte chu puanzarsak turin a ngen. CYMA hruaitute chuan, Mizoram aṭanga Rihdil tlawh turte'n Zokhawthara Assam Rifles-te laka harsatna an tawh ṭhinte enfiah ni se an duh thu, Brig. Vinod S chu an hrilh ve bawk.

Bru Convention

Zanin aṭang hian Damparengpui, Mamit district-ah Home Mission North Bru Convention vawi 4-na neih a ni dawn a, Pathianni zanah a ṭiak ang. Inkhawmpuia thupui tur chu 'Ringtu nun' tih a ni a, speaker tur chu H Lalṭanpuia, Kraws Fate Team a ni ang.

Lusún khawhar

Thangrikhumi (83) w/o C Lalkhawliana, Chanmari, Aizawl chu nimin chhun dar 10:55 khan a thi a, vawiinah an chennaah vui a ni ang. Thangrikhumi hi chanchinbu lamah nasa taka inhmang ṭhin a ni a, a pasal C Lalkhawliana hi Mizorama prominent journalist mi tlemtê zinga mi niin, sap ṭawng chanchinbu Highlander editor leh publisher a ni.

PMMVY sawiho

Nimin khan Lawngtlai DC pisa conference hall-ah Lawngtlai additional DC B Lalchhawntluanga hoin District Level Steering & Monitoring Committee on Pradhan Mantri Matru Vandana Yojana (PMMVY) an ṭhukhawm a; Social Welfare department aiawh te, Chief Medical Officer aiawh, bank hrang hrang aiawhte leh common service centre neitute an tel. PMMVY hi nu leh nausen thihna tihtlemna tura hmalakna a ni a, August 2018 aṭanga kumin October thla thleng khan Lawngtlai district-ah mi 1,046-in PMMVY ṭanpuina an dawng tawh a, chuta tan chuan Rs. 41,45,000 pek a ni.

CEM-in hawng

Mizoram Football Association (MFA) leh Siaha District Football Association (SDFA)-te chuan nimin aṭang khan Siaha District khelmualah Inter-District Women's Football Tournament 2019 an buatsaih ṭan a, MADC chief executive member N Zakhai-a'n a hawng. CEM hian SDFA ṭanpui nan Rs. 20,000 a hlân nghal a ni.

DAWNTISEI

Tihsual hi hlawhchhamna a ni lo, hlawhtlinna kalkawng a ni

Damdawiin aṭang Nawaz Sharif lachhuak

Pakistan prime minister hlui Nawaz Sharif chu a in lama inenkawl zui turin, damdawiin aṭangin Nilaini khan lakchhuah a ni.

Kum 69 mi, Pakistan Muslim League-Nawaz (PML-N) hotupa Sharif hi a hriselna ṭhat loh avangin October 22 khan a tanna jail aṭanga lachhuakin, Services Hospital-ah dah luh a ni a, damdawiina dah luh an nih chhan chu a thisena a platelet hniam lutuk vang a ni. Damdawiina dah luh a nih khan a platelet chu 2,000 chauh a ni.

Sharif rual hian a fanu Maryam Nawaz pawh damdawiin aṭanga in lama inenkawl zui tura lakchhuah a ni ve bawk. Islamabad High Court chuan thla hlui khan Al-Azizia Steel Mills corruption case avanga tang, Sharif hi kar riat chhung atan bail a phal sak. He case-ah hian Sharif hian thiam loh changin, kum sarih tang tura hrem a ni.

Chaudhry Sugar Mills case-ah pawh Sharif hian thubuai neiin, Lahore High Court chuan vawi tam tak bail-in a lo chhuah ve tawh bawk a ni.

Tun kar tir lam khan Chaudhry Sugar Mills case avanga thubuai nei mek, Maryam Sharif hi a pa ṭhat tawk lo avangin Lahore High Court chuan a bial dilna a pawmsak bawk.

Pakistan Muslim League-Nawaz thupuangtu Marriyum Aurangzeb chuan Sharif-a in lamah hian Intensive Care Unit (ICU) ṭha tawk tak, Sharif enkawlna turin dah a nih thu a sawi. Heng bakah hian doctor-in an rawtna angin special medical unit pawh dah a ni thu a sawi bawk.

Sharif platelet hi 30,000-40,000 a ni tlangpui a, a dinhmun hi a la ṭha em em lo a ni. Damdawiina enkawl a nih lai khan a platelet hniam vangin, a hahni leh a taksa hmun dang aṭangin thite a chhuak ṭhin a ni.

Share this Post

Login to comment

No Comments