International Criminal Court (ICC) chuan Congo hel hruaitu hlui, Bosco Ntaganda chu nimin khan kum 30 tang turin a hrem. 

"Terminator" tia a hming an phuahsak, Ntaganda hian kum 2002 leh 2003 khan Democratic Republic of Congo-a Ituri bialah civil mi tam tak a thah tir a ni. Mi tam tak sal anga chhawr lui leh, mipat hmeichhiatna hman luih tirahte puh a ni bawk. 

Kumin July thla khan The Hague-a ICC chuan thubuai 13-ah Ntaganda hi thiam loh a lo chantir tawh a ni. Judge-te chuan Union of Congolese Patriots helpawl leh an  military wing, the Patriotic Forces for the Liberation of Congo (FPLC) ten pawikhawihna an thlen ṭhinah Ntaganda hi a ruahmantu ber a ni ṭhin tih an sawi. 

Ntaganda hi hmeichhe kum tling lote pawngsual leh kum 15 tling lote helpawl sipai atana lalut ṭhina puhnaah pawh thiam loh chantir a ni bawk. 

Kum 46 mi, Bosco Ntagan­da chuan ICC hremna pek hi appeal a tum tih a sawi. Judge-te hnenah misual ni loin sipai a nih thu leh, 'Terminator' tia hminglem an vuahsak chu a inhmeh loh thute a hrilh. 

Share this Post