Japan lal Naruhito chu Tokyo-a Imperial Palace hmun­ah nimin khan lallukhum khum tirna hun hman a ni a, ram 100 chuang aṭangin mi pawi­mawhte'n an telpui.

Naruhito hi a pa Akihito-an Japan lal a nihna a chawlhsan hnuah, kumin May 1 aṭang khan Japan lal nihna dinhmun hi a chelh tawh a, mahse nimin khan lallukhum hi khumtir a ni. He hun hmanpuitu mi 2,000 chuang hmaah kum 59 mi, Naruhito chuan thutiam a la a ni. 

"Ka duhthusamah chuan mi zawng zawngte hi hlim vek se ka duh a, khawvelah hian remna leh muanna hi awm se ka duh bawk a ni. Danin a sawi ang zelin mipuite kan inlungrual tur a ni," tiin kalkhawmte hmaah Naruhito chuan a sawi. 

February 23, 1960-a piang Naruhito hi Japan lal 126-na a ni. Indopui II hnua piang zingah Japan lal ni thei hmasa ber a ni. A nupui Empress Masako nena fanu pakhat, kum 17 mi  Princess Toshi an nei. 

Lal thar lawmna tura rua­hmanna chu ni 10 liam taa Typhoon Hagibis in chhiatna nasa tak thlen a, mi 80 zetin an thihphah avangin tihkhawtlai a ni. Thlipuiin thil a tihchhiat thenfai a, thlipui tleh tuarte chhawmdawlna te tihfel a nih hnu, November thlaah lal thar lawmna public parade chu neih tura sawn hlat a ni. 

Share this Post