Australia chanchinbute'n Sorkar laka lungawi lohna lantir

Thawhṭannia Australia chanchinbu chhuakte chuan sorkar laka lungawi lohna lantirna atan, chanchinbu hmaa thuziakte thai dum a ni.

Australia chanchinbumite lungawi loh chhan hi, an thuchhuah chungchanga zalenna zau tak an neih loh vang leh an duhthu an sawi theih loh vang a ni tih an sawi. 

Sorkar chuan press mite zalenna pek chu a thlawp thu a sawi a, hemi rual hian tumah dan chunga leng an awm lo a ni, a ti thung. 

Kumin June thla khan police-te chuan Australian Broadcasting Corporation (ABC) office leh News Corp Australia journalist chenna in chu an dap a, hei hian sawizui a hlawh hle. Police-ten an dapna chhan hi whistleblower hnen aṭanga an thu dawn article, sorkar agency-in Australia mite enthlak a tum thu leh, war chungchang an chhuah vang niin media organisation chuan a sawi. 

Australia prime minister  Scott Morrison chuan Aus­tralia democracy-ah chuan press mite zalenna pek chu thil pawimawh tak a ni a, mahse dan pawh zawm a ṭul tih a sawi a nghal bawk. "Mi tupawhin dan an zawm hi a ngai a, kei pawh,  journalist te pawh a  huam vek a ni," a ti. 

Hetihlai hian media organisation chuan sorkarin national security law a siam chuan investigative journalism lam a nghawng a, mipuite thil dik an hriat theihna tur lakah chanchinbu mite a hrekbet a ni, an ti. Hei vang hian heng dante hi siamṭha turin sorkar chu an phut a ni. 



Share this Post

Login to comment
No Comments