Israel prime minister Ben­jamin Netanyahu chuan hun tiam chhungin ṭangrual sorkar thar chu a siam thei dawn ta lo tih sawiin, party dang kutah a hlan. 

April thla khan Israel ram inthlanpui hi neih niin party mala sorkarna siam thei an awm lo. Hei vang hian Netanyahu chuan a party, Likud Party kaihhruaina hnuaia ṭangrual sorkar siam tumin  hma a la a, mahse hun tiam chhungin sorkar hi an siam thei ta lo a ni. Sorkar thar a din theih tak loh vangin September thla khan inthlanpui hi neih ṭhat leh a ni a, hemi ṭum pawh hian party mala sorkarna siam thei an awm lo leh. 

September thla inthlanpuiah khan Parliament seat 120-ah Likud Party hian seat 32 lain Blue and White Party chuan seat 33 a la. Mahse hetichung hian  President Reuven Rivlin  chuan Netanyahu hi party dang thlawptu a ngah zawk avangin sorkar siam tur hian a sawm zawk a ni. Ṭangrual sorkar siam tur hian sawm an nih 

aṭangin ni 28 chhungin an tihfel a ngai a, vawiin hi a hun neih tawp ni a ni. Mahse Netanyahu hian party dangte nen inremna an siam theih tak loh vangin ṭangrual sorkar siam a tumna chu a hlawhchham ta tih Thawhṭanni khan a puang. 

Thuchhuah a siamah, Netan­yahu chuan a khingpui ber, Blue and White Party hruaitu sipai hotu hlui Benny Ganzt chu ṭangrual sorkar siampui tuma biain theihtawp a chhuah tih a sawi a, mahse anni lam hian an lo hnar zel a ni, a ti. Netanyahu hi right-wing party-ten an thlawp a ni. Mahse Shas hian seat riat, United Torah Judaism-in seat sarih leh Yamina in seat sarih an nei a, thlawptu a neih zat hi 55 chauh an tling pha a, sorkar siam tur hian MP thlawptu 61 neih phak a ngai. 

Netanyhu-an ṭangrual sorkar a siam thei dawn lo tih a sawi tak avangin, President Rivlin chuan Benny Ganzt chu sorkar thar siam turin a sawm ve leh ang a, ni 28 chhung hun pek a ni ve leh ang. Israeli Arab MP-te chuan Ganzt hi thlawp an tum thu an sawi.

Hun pek chhunga Ganzt hi a hlawhchham ve leh a nih chuan, Parliament member-te chuan midang pakhat sawm turin an rawt ve thei ang. 

Candidate pathumna rawt ngaia an awm a nih chuan a thlen vawi khatna tur a ni dawn a, ani hian hun pek chhunga sorkar a siam thei lo ve leh a nih chuan kumin chhungin a ṭum thumna atan Israel hian inthlanpui a hmachhawn  leh a ngai dawn a ni. 

Share this Post