MBBA League Final Game 1-ah Hollow BBSP an chak

Mizoram Basketball Association buatsaih MBBA League-a Division I champion-in Mizoram Super League an khel dawn. Nimin khan Division 1 final game hmasa berah Chawnpui VR4-in Hollow BBSP chu 86-80 in an hneh, Hollow-in MSL khel turin vawi khat chak bak an mamawh tawh lo.

Hawla Indoor Stadium, Republic Vengthlanga inkhelah team pahnih an inhlau lo tawn a, overtime vawi hnih khelh ngai khawpa inhnehtawkin inkhel hmuhnawm an chhawp chhuak.

Hollow tan Vanlalṭhazuala a langsar a, point 41 zet thunin Hollow chakna hnar a ni.

Division I final Game 2 hi February 11, Ningani chawhnu dar 1:30-ah khelh leh tur a ni a, Chawnpui VR4 tan beisei a la bo lo. Ningania an inkhel turah an chak theih chuan final Game 3 an khel thei dawn.

Nimin khan Division II semifinal khelh a ni bawk a, inkhel hmasa zawkah Bethlehem BC chuan 63- 37 in 1LA a hneh a, semifinal hnuhnung zawkah Tuikual South BC Youth chuan 78-69 in Aizawl Venglai an hneh ve bawk.

Division II final-a inhmachhawn tur Bethlehem BC leh Tuikual South BC-te hian final an luh avangin season thar aṭang chuan Division I an khel tawh dawn a ni.

Division II final hi February 11, Ningani chhun dar 12:00-ah Division I Game 2 final khelh hmain khelh a ni ang.