United States defence secretary Mark Esper chuan ruahmanna an siam dan chuan Syria aṭanga America sipai an lakchhuah zawng zawngte chu Iraq khawthlang lamah thawnluh vek an tum tih sawiin, Isla­mic State firfiakte lakah beihpui an thlak chhunzawm mai thei tih a sawi. 

Mark Esper hi Syria chhuahsan US sipaiten khawi lam nge an pan dawn tih sawitu hmasa ber a ni a, ruahmanna an siam chungchangah hian Iraq lam pawh a be tawh bawk. Syria-a an sipai dah 700 aia tam chuan Iraq lam hi an pan dawn niawm tak a ni. 

US hian Syria aṭang hian a sipaite a lakchhuah chhunzawm a, US leh Turkey hruaitute hian kar liam ta Zirtawpni khan ni nga chhung inkahhai puang mah se US-in IS beihnaa a thurualpui  Syria Kurdish force leh Turkey hi an inkap chhunzawm reng tho nia tarlan a ni a, boruak erawh a hma ai chuan a ziaawm deuh thung. 

Esper chuan Iraq-a sipai an thawnte chuan tihtur pahnih an nei tih sawiin, pakhat chu Iraq chhanhim a ni a, a dang leh chu ISIS do let beihpui thlak a ni, a ti. Hetihlai hian an ruahmanna hi an la thlak leh thei tih erawh sawi telin, sipai an lakchhuah kim hunah hei hi a chiang dawn chauh a ni.

Ram pahnih inremna siam angin Iraq-ah hian America sipai 5,000 aia tam an awm mek bawk. 2011 khan Iraq aṭang hian a sipaite lachhuak tawh mah se 2014 khan IS-te beihpui thlakna avangin an dahlut leh.

Esper hian NATO mee­ting-ah pawh IS beihlet dan tur chungchang hi sawi­chhuah a tum bawk a ni. 

Share this Post